امریکی سافٹ ویئر کمپنی ایڈوبی نے اعلان کیا ہے کہ کمپنی کے چیف ایگزیکٹو آفیسر شانتنو نارائن نئے سربراہ کی تقرری کے بعد اپنے عہدے سے سبکدوش ہو جائیں گے۔ اعلان کے بعد آفٹر آور ٹریڈنگ میں ایڈوبی کے شیئرز تقریباً 7 فیصد تک گر گئے۔
یہ بھی پڑھیں: آپ کی پی ڈی ایف فائلز اب بولیں گی، ایڈوبی نے نیا اے آئی فیچر متعارف کرا دیا
شانتنو نارائن 1988 میں بطور نائب صدر اور جنرل منیجر ایڈوبی میں شامل ہوئے تھے جبکہ 2007 میں انہیں کمپنی کا سی ای او مقرر کیا گیا۔ ان کی قیادت میں ایڈوبی نے روایتی سافٹ ویئر لائسنس ماڈل سے سبسکرپشن سسٹم کی جانب تاریخی تبدیلی کی اور کریئیٹو کلاؤڈ پلیٹ فارم کو عالمی سطح پر وسعت دی۔
View this post on Instagram
کمپنی نے اپنے بیان میں کہا کہ نارائن نے ایڈوبی کو جدید ٹیکنالوجی خصوصاً جنریٹو آرٹیفیشل انٹیلیجنس کے دور کے لیے مضبوط بنیاد فراہم کی۔ ایڈوبی کے لیڈ انڈیپنڈنٹ ڈائریکٹر نے کہا کہ نارائن گزشتہ 18 سال کے دوران کمپنی کی تبدیلی کے معمار رہے اور انہوں نے ایڈوبی کو اے آئی سے چلنے والے مستقبل کے لیے تیار کیا۔
یہ بھی پڑھیں: 2025 میں ٹیکنالوجی کی کونسی کمپنیاں سب سے قیمتی قرار پائیں؟
کمپنی کے مطابق نئے سی ای او کی تلاش جاری ہے اور اس عمل میں چند ماہ لگ سکتے ہیں۔ شانتنو نارائن عبوری مدت میں اپنی ذمہ داریاں جاری رکھیں گے تاکہ قیادت کی منتقلی کا عمل ہموار انداز میں مکمل ہوسکے۔
اپنے پیغام میں نارائن نے ملازمین کو بتایا کہ وہ بطور بورڈ ممبر کمپنی کے ساتھ منسلک رہیں گے اور نئے سی ای او کی معاونت کریں گے۔ انہوں نے کہا کہ ایڈوبی میں شامل ہونے کی سب سے بڑی وجہ نئی مارکیٹیں تخلیق کرنے، عالمی معیار کی مصنوعات بنانے اور مسلسل جدت لانے کا وژن تھا، جسے کمپنی نے برقرار رکھا ہے۔
