خیبرپختونخوا کے ضلع کوہاٹ میں پولیس نے دہشتگردوں کے خلاف کارروائی کے دوران 6 شرپسند ہلاک کر دیے گئے ہیں۔
کوہاٹ پولیس کے محکمہ انسداد دہشتگردی کے اہلکاروں نے فتنہ الخوارج کے دہشتگردوں کے قبضے سے جدید اسلحہ اور دیگر ساز و سامان بھی برآمد کیا ہے۔
پولیس کے مطابق کوہاٹ کے تھانہ لاچی کی حدود میں محکمہ انسدادِ دہشت گردی یعنی سی ٹی ڈی اور دہشتگردوں کے درمیان شدید فائرنگ کے تبادلے کے نتیجے میں 6 دہشت گرد مارے گئے۔
یہ بھی پڑھیں: افغان طالبان کا کوہاٹ میں ڈرون حملے کرنے کا دعویٰ؟ حقیقت کیا ہے؟
ابتدائی اطلاعات کے مطابق دہشتگردوں نے مذکورہ علاقے میں پہلے سے پوزیشنیں سنبھالتے ہوئے سی ٹی ڈی اہلکاروں کو نشانہ بنانے کے لیے گھات لگا رکھی تھی۔
سی ٹی ڈی کی آپریشن ٹیم کے موقع پر پہنچتے ہی دہشتگردوں نے اچانک حملہ کر دیا، جس کا اہلکاروں نے فوری اور مؤثر جواب دیا۔
حملے کی اطلاع ملنے پر کوہاٹ پولیس کی نفری بھی جائے وقوعہ پر پہنچ گئی اور دہشتگردوں کا جوانمردی سے مقابلہ کیا۔
مزید پڑھیں: کوہاٹ میں ینگ ڈاکٹر کا قتل: ’خاتون ڈاکٹر نے خواتین وارڈ میں داخلے سے منع کیا جو اس کا قصور بنا‘
فائرنگ کا تبادلہ ختم ہونے کے فوراً بعد علاقے میں وسیع پیمانے پر سرچ اور سینیٹائزیشن آپریشن شروع کر دیا گیا۔
کارروائی کے دوران جائے وقوعہ سے فتنہ الخوارج سے تعلق رکھنے والے چھ مسلح شرپسندوں کی لاشیں برآمد ہوئیں۔
تلاشی کے دوران ہلاک دہشت گردوں کے قبضے سے 4 دستی بم، 6 ایس ایم جی رائفلیں، 6 بینڈولیئرز، 12 اسپیئر میگزین اور متعدد کارتوس برآمد کیے گئے ہیں۔
مزید پڑھیں: کوہاٹ میں تیل و گیس کے ذخائر دریافت: وزیراعظم کی مزید تلاش کی ہدایت
جو اس بات کی نشاندہی کرتے ہیں کہ دہشتگرد طویل مقابلے کی منصوبہ بندی کر کے آئے تھے۔
حکام کے مطابق علاقے میں ممکنہ طور پر چھپے دیگر شرپسندوں کی موجودگی کے خدشے کے پیش نظر سرچ آپریشن تاحال جاری ہے جبکہ پولیس کی جانب سے صورتحال کی مسلسل نگرانی کی جا رہی ہے۔
ہلاک ہونے والے دہشتگردوں کی شناخت اور ان کے سابقہ ریکارڈ کی جانچ پڑتال کا عمل بھی شروع کر دیا گیا ہے۔
