خطے میں امن کے لیے پاکستان کا کردار نہایت اہمیت کا حامل ہے، سلیم مانڈوی والا

سینیٹر سلیم مانڈوی والا نے کہا ہے کہ پاکستان کے ایران کے ساتھ مضبوط اور تاریخی تعلقات قائم ہیں اور خطے میں امن کے لیے پاکستان کا کردار نہایت اہمیت کا حامل ہے، جسے تاریخ میں یاد رکھا جائے گا۔

وی نیوز سے گفتگوکرتے ہوئے پاکستان پیپلز پارٹی کے رہنما و سینیٹر سلیم مانڈوی والا نے کہا کہ بھارت پاکستان کو سفارتی محاذ پر تنہا کرنا چاہتا تھا، تاہم موجودہ صورتحال میں عالمی ذرائع ابلاغ پاکستان کے کردار کو نمایاں طور پر اجاگر کررہے ہیں، جو ملک کی سفارتی کامیابی کی علامت ہے۔

یہ بھی پڑھیں: چین کی صدر زرداری کو جے 35 اور بنا پائلٹ طیاروں پر بریفنگ، پاکستان اس جدید دفاعی ٹیکنالوجی میں دلچسپی رکھتا ہے، سلیم مانڈوی والا

انہوں نے کہا کہ پاکستان نے خطے میں کشیدگی کم کرنے کے لیے مثبت اور ذمہ دارانہ کردار ادا کیا ہے اور مختلف ممالک سے رابطے کر کے ثالثی کے لیے اپنی آمادگی ظاہر کی۔ ان کے مطابق اگر جاری کوششوں کے نتیجے میں جنگ کے خاتمے کی کوئی مثبت پیشرفت ہوتی ہے تو پاکستان کا کردار تاریخ کا حصہ بن جائے گا۔

سلیم مانڈوی والا نے کہا کہ ایران پاکستان کا ہمسایہ ملک ہے اور دونوں ممالک کے درمیان 900 کلومیٹر سے زیادہ طویل سرحد موجود ہے، جس کی وجہ سے باہمی تعلقات منفرد نوعیت کے حامل ہیں اور یہی وجہ ہے کہ پاکستان کا کردار اس معاملے میں انتہائی اہم ہے۔

انہوں نے مزید کہا کہ پاکستان نے براہ راست نہیں بلکہ سفارتی سطح پر متحرک کردار ادا کیا ہے اور توقع ہے کہ مذاکرات کے ذریعے مثبت نتائج سامنے آئیں گے۔

یہ بھی پڑھیں: ایران امریکا کے مابین ثالثی: پاکستان کے نمایاں کردار پر بھارت میں ہنگامہ، کانگریس نے مودی حکومت کو دھو ڈالا

داخلی سیاسی صورتحال سے متعلق سوال کے جواب میں انہوں نے کہا کہ اس وقت ملک کی اندرونی سیاست اس نوعیت کی نہیں کہ وہ پاکستان کے بین الاقوامی کردار پر اثر انداز ہو، جبکہ تمام سیاسی قوتیں قومی مفاد کے معاملے پر متفق ہیں اور ریاستی مؤقف کی حمایت کررہی ہیں۔

انہوں نے کہا کہ چیئرمین پیپلزپارٹی بلاول بھٹو زرداری بھی تمام فریقین کو ساتھ لے کر چلنے کے خواہاں ہیں تاکہ قومی سطح پر یکجہتی کو فروغ دیا جاسکے۔