وزیراعظم شہباز شریف نے صدر مملکت آصف علی زرداری سے ملاقات کی ہے، ملاقات میں خطے میں امن کے لیے پاکستان کے ممکنہ سفارتی کردار پر گفتگو کی گئی۔
میڈیا رپورٹس کے مطابق جمعرات کے روز وزیراعظم شہباز شریف نے صدر مملکت آصف علی زرداری سے ایوانِ صدر میں اہم ملاقات کی، جس میں مشرق وسطیٰ کی موجودہ صورتحال، پاکستان کی سفارتی کوششوں اور ملکی امور پر تفصیلی تبادلہ خیال کیا گیا۔
یہ بھی پڑھیں: صدر مملکت سے وزیراعظم شہباز شریف کی ملاقات، ملکی ترقی کے لیے مل کر کام کرنے کا اعادہ
ملاقات کے دوران خطے میں بڑھتی کشیدگی اور اس تناظر میں پاکستان کے ممکنہ سفارتی کردار پر گفتگو کی گئی، جبکہ وزیراعظم نے صدر مملکت کو مشرق وسطیٰ کی صورتحال اور پاکستان کی جانب سے جاری سفارتی اقدامات پر اعتماد میں لیا۔
دونوں رہنماؤں کے درمیان ملکی سکیورٹی، معاشی حالات اور توانائی کے شعبے کو درپیش چیلنجز پر بھی تفصیلی مشاورت ہوئی۔
یہ بھی پڑھیں: ایوانِ صدر میں اعلیٰ سطحی مشاورتی اجلاس: معیشت، توانائی اور علاقائی سلامتی کا تفصیلی جائزہ
صدر مملکت آصف علی زرداری نے خطے کی موجودہ صورتحال میں پاکستان کے فعال اور مثبت کردار کو سراہتے ہوئے کہا کہ پاکستان امن و استحکام کے فروغ کے لیے اپنا مؤثر کردار ادا کرنے کے لیے تیار ہے۔
صدر مملکت کا کہنا تھا کہ پاکستان نہ صرف اپنے پڑوسی ممالک بلکہ عالمی سطح پر کشیدگی کے خاتمے اور مذاکرات کے فروغ کے لیے مثبت کردار ادا کرنے کی پالیسی پر کاربند ہے۔
