خیبر پختونخوا کے ضلع مردان میں کان کنی کے دوران سلائیڈنگ کے نتیجے میں 9 مزدور جاں بحق جبکہ 2 زخمی ہو گئے۔
ریسکیو 1122 کے ترجمان کے مطابق واقعہ رستم کے علاقے ننگ آباد میں مائننگ کے دوران سلائیڈنگ کے باعث پیش آیا۔ اطلاع ملتے ہی ریسکیو ٹیمیں موقع پر پہنچ گئیں۔
یہ بھی پڑھیں: مردان میڈیکل کمپلیکس زیادتی کیس: ایف آئی آر میں نامزد ملازمین معطل
ریسکیو حکام کا کہنا ہے کہ 8 افراد کی لاشیں ملبے سے نکالی گئی تھیں، جبکہ 3 زخمیوں کو علاج کے لیے اسپتال منتقل کیا گیا تھا، تاہم ایک شخص زخموں کی تاب نہ لاتے ہوئے چل بسا ہے،جس کے بعد مرنے والوں کی تعداد 9 ہوگئی۔
وزیراعلیٰ خیبر پختونخوا محمد سہیل آفریدی نے مردان میں مائننگ حادثے کا نوٹس لیتے ہوئے قیمتی جانوں کے ضیاع پر افسوس کا اظہار کیا ہے۔
مزید پڑھیں: مردان کے عوام صحت کے انقلابی منصوبوں سے محروم
متاثرہ خاندانوں سے دلی ہمدردی اور تعزیت کا اظہار کرتےہوئے وزیراعلیٰ سہیل آفریدی نے واقعے کی وجوہات جاننے اور حفاظتی اقدامات مزید مؤثر بنانے کی ہدایت کی۔
وزیراعلیٰ ہاؤس سے جاری بیان کے مطابق وزیراعلیٰ نے کہا ہے کہ ایسے واقعات کی روک تھام کے لیے سیکیورٹی اور سیفٹی پروٹوکول پر سختی سے عمل کیا جائے۔
انہوں نے متاثرہ خاندانوں کو یقین دلایا ہے کہ صوبائی حکومت ان کے غم میں برابر کی شریک ہے اور مشکل کی اس گھڑی میں انہیں تنہا نہیں چھوڑا جائے گا
