وزیراعلیٰ سندھ سید مراد علی شاہ کی زیر صدارت گل پلازہ کی آتشزدگی سے متاثرہ افراد کو معاوضوں کی ادائیگی کے حوالے سے اجلاس میں اہم فیصلے کرلیے گئے۔
مزید پڑھیں: گل پلازہ آتشزدگی کیس: ڈپٹی کمشنر جنوبی کا جوڈیشل کمیشن میں تفصیلی جواب جمع
اجلاس میں جاں بحق ہونے والے افراد کے لواحقین کے لیے 85 کروڑ روپے مختص کرنے اور ہر خاندان کو ایک کروڑ روپے معاوضہ دینے کی منظوری دی گئی۔
اجلاس میں بتایا گیا کہ اب تک 72 میں سے 61 متاثرہ خاندانوں کو گھروں پر چیک کے ذریعے رقم فراہم کر دی گئی ہے۔
متاثرہ تاجروں کے لیے 60 کروڑ روپے مختص کیے گئے ہیں اور ہر دکاندار کو 5 لاکھ روپے امداد دینے کا فیصلہ کیا گیا ہے، جس کے تحت اب تک 843 دکانداروں کو رقم فراہم کی جا چکی ہے۔ چونکہ دکانوں کی تعداد 1184 سے بڑھ کر 1209 ہو گئی ہے، اس لیے حتمی فہرست مرتب کرنے کی ہدایت بھی دی گئی۔
وزیراعلیٰ سندھ نے کہاکہ تصدیقی عمل کو تیز کیا جائے، نادرا سے فوری رابطہ قائم کیا جائے اور مستحقین کو شفاف اور بروقت ادائیگی یقینی بنائی جائے۔
انہوں نے کہاکہ ایک شخص کی متعدد دکانوں کے معاملے پر واضح پالیسی بنائی جائے اور ایس بی سی اے کو گل پلازہ کی ازسرنو تعمیر کا منصوبہ پیش کرنے کا حکم دیا گیا۔
مزید پڑھیں: سانحہ گل پلازہ: کئی گیٹ بند تھے، ریسکیو میں تاخیر ہوئی، امدادی کارکنوں کے جوڈیشل کمیشن میں بیانات
سید مراد علی شاہ نے یقین دلایا کہ متاثرہ خاندانوں اور تاجروں کو ہر ممکن ریلیف فراہم کیا جائے گا اور انصاف یقینی بنایا جائے گا۔
