پولینڈ کے شہر رائبونک میں اس وقت ایک دلچسپ اور حیرت انگیز صورتحال پیدا ہو گئی جب ایک خاتون جوگر نے جنگلاتی علاقے میں وسطی امریکا سے تعلق رکھنے والا ایک نایاب چوہا ‘اگوٹی’ گھومتے ہوئے دیکھا۔
یہ بھی پڑھیں: خطرناک جنگلی بلی گھر سے فرار، حکام نے شہریوں کو خبردار کردیا
یہ جانور، جو جسامت میں ایک بڑی بلی کے برابر اور شکل و صورت میں گنی پگ سے مشابہت رکھتا ہے، عام طور پر وسطی اور جنوبی امریکا کے گرم علاقوں میں پایا جاتا ہے۔
مقامی فاریسٹری حکام کے مطابق یہ واقعہ مارچ کے اختتام پر پیش آیا۔ رائبونک فاریسٹری کے ترجمان کاسپر پاٹوریج نے میڈیا کو بتایا کہ جب خاتون نے فون پر اس غیر معمولی جانور کی اطلاع دی تو انہیں پہلے پہل یقین نہیں آیا، تاہم جب خاتون نے ثبوت کے طور پر اس کی تصویر بھیجی تو حکام فوری کارروائی پر مجبور ہو گئے۔
یہ بھی پڑھیں: 5 فٹ لمبا آبی چھپکلی نما جانور 2 ریاستوں کو چکمہ دینے کے بعد گرفتار
ترجمان کا مزید کہنا تھا کہ اگوٹی کو پکڑنے کی ابتدائی کوششیں ناکام رہیں کیونکہ یہ چھوٹا سا جانور غیر متوقع طور پر جارحانہ ہوگیا تھا، جس کی وجہ سے آپریشن روکنا پڑا۔ بعد ازاں، جنگلی حیات کی بحالی کے مرکز سے ماہرین کو طلب کیا گیا جنہوں نے انتہائی مہارت سے اسے قابو کیا۔
ذرائع کا کہنا ہے کہ یہ نایاب چوہا کسی مقامی شہری کے نجی باڑے یا گھر سے فرار ہوا ہے، کیونکہ پولینڈ کے سرد ماحول میں اس کا قدرتی طور پر پایا جانا ناممکن ہے۔ فی الحال یہ اگوٹی بحالی کے مرکز میں ماہرین کی نگرانی میں ہے اور مکمل طور پر محفوظ ہے۔
