ٹیکنالوجی کمپنی ایپل (Apple) کے مصنوعی ذہانت (اے آئی) شعبے کے سربراہ جان جیانندریا (John Giannandrea) 8 سال بعد کمپنی سے علیحدگی کے قریب ہیں۔
میڈیا رپورٹس کے مطابق 2025 میں ریٹائرمنٹ کے اعلان کے بعد انہیں مشاورتی کردار تک محدود کر دیا گیا تھا، جبکہ اب امکان ہے کہ وہ 15 اپریل کے قریب باضابطہ طور پر ایپل پارک سے رخصت ہو جائیں گے۔
مزید پڑھیں: ایپل کے 50 سال، کامیاب ترین 3مصنوعات، تین جو توقعات پر پوری نہ اترسکیں
جان جیانندریا 2018 میں گوگل سے ایپل میں شامل ہوئے تھے، جہاں وہ اے آئی ڈویلپمنٹ کے سربراہ تھے۔ ایپل میں انہیں سری اور دیگر اے آئی منصوبوں پر کام سونپا گیا، تاہم وقت کے ساتھ ان کی ذمہ داریاں تبدیل ہوتی رہیں۔
2025 میں سری کا کنٹرول ان سے لیکر مائیک راک ویل (Mike Rockwell) کے حوالے کر دیا گیا تھا، بعد ازاں ان کے بیشتر اختیارات دیگر اعلیٰ عہدیداروں میں تقسیم کر دیے گئے۔
مزید پڑھیں: ایپل 50 سال کا ہوگیا: سالگرہ پر ڈسکاؤنٹ آفرز، پاکستان میں کیا فائدہ ہوسکتا ہے؟
اگرچہ انہیں اندرونی طور پر مکمل طور پر کامیاب نہیں سمجھا گیا، تاہم ماہرین کے مطابق ایپل کی موجودہ اے آئی حکمت عملی میں ان کے کام کا اہم کردار رہا ہے۔
رپورٹس کے مطابق ان کے کنٹریکٹ کے تحت اسٹاک آپشنز 15 اپریل کو مکمل ہو رہے ہیں، جس کے بعد ان کی باضابطہ علیحدگی متوقع ہے۔
