پاک بحریہ، پاکستان میری ٹائم سکیورٹی ایجنسی، جوائنٹ میری ٹائم انفارمیشن کوآرڈینیشن سینٹر اور اینٹی نارکوٹکس فورس (سندھ) نے ایک مربوط انٹیلیجنس آپریشن کے دوران بحیرہ عرب میں بڑی کامیابی حاصل کی ہے۔
یہ بھی پڑھیں: بحیرۂ عرب میں پاک بحریہ کی بڑی کارروائی، 130 ملین ڈالر مالیت کی منشیات ضبط
پیر کے روز کیے گئے اس آپریشن میں ایک بے ریاست جہاز کو روک کر اس سے بھاری مقدار میں غیر قانونی شراب برآمد کر لی گئی، جو کہ غیر قانونی ترسیل اور تقسیم کے لیے اسمگل کی جارہی تھی۔
حکام کے مطابق اس کامیاب کارروائی کی بنیاد بروقت انٹیلیجنس معلومات اور تمام متعلقہ اداروں کے درمیان بہترین پیشہ ورانہ ہم آہنگی تھی، بین الاقوامی مارکیٹ میں ضبط شدہ ممنوعہ سامان کی تخمینی مالیت 20 کروڑ روپے سے زائد بتائی جارہی ہے۔
کارروائی کے بعد پکڑی گئی اشیاء کو مزید قانونی کارروائی اور تحقیقات کے لیے اے این ایف (سندھ) کے حوالے کردیا گیا ہے۔
یہ بھی پڑھیں: کسٹمز انفورسمنٹ کوئٹہ کی کارروائیاں، 31 کروڑ 70 لاکھ روپے مالیت کا اسمگل شدہ سامان ضبط
یہ مشترکہ آپریشن پاکستان کے قانون نافذ کرنے والے اداروں کے اس عزم کا عکاس ہے کہ ملکی سمندری سرحدوں پر کسی بھی قسم کی غیر قانونی سرگرمی اور اسمگلنگ کو برداشت نہیں کیا جائے گا۔
ماہرین کا کہنا ہے کہ اداروں کے درمیان اس نوعیت کا اشتراک علاقائی سلامتی اور بحری تجارت کے تحفظ کو یقینی بنانے میں کلیدی کردار ادا کرتا ہے۔
