کوئٹہ کے بولان میڈیکل کمپلیکس (بی ایم سی) اسپتال سے زیر علاج ایک خطرناک قیدی پولیس کو چکمہ دے کر فرار ہونے میں کامیاب ہو گیا، جس کے نتیجے میں غفلت برتنے والے 5 اہلکاروں کو معطل کردیا گیا ہے۔
یہ بھی پڑھیں: دکی کی سب جیل سے 3 قیدی فرار، غفلت برتنے پر 3 پولیس اہلکار گرفتار
پولیس کے مطابق مفرور قیدی کی شناخت تاج محمد کے نام سے ہوئی ہے جو پیشے کے لحاظ سے پٹواری تھا اور قتل کے ایک مقدمے میں گرفتار تھا۔ ملزم کو لورالائی جیل سے علاج کی غرض سے کوئٹہ لایا گیا تھا جہاں وہ اسپتال میں زیر علاج تھا۔
قیدی کے فرار ہونے پر محکمہ پولیس نے سخت ایکشن لیتے ہوئے ڈیوٹی پر تعینات سیکیورٹی انچارج سب انسپکٹر منظور احمد سمیت پانچ اہلکاروں کو فوری طور پر معطل کردیا ہے۔ ان اہلکاروں کے خلاف فرائض میں غفلت برتنے پر بروری تھانے میں مقدمہ بھی درج کرلیا گیا ہے۔
یہ بھی پڑھیں: کراچی میں زلزلے کے دوران ملیر جیل میں ہنگامہ، 200 سے زائد قیدی فرار، ایک ہلاک
ڈی آئی جی لورالائی نے واقعے کا نوٹس لیتے ہوئے ایس پی کی سربراہی میں ایک اعلیٰ سطحی انکوائری ٹیم تشکیل دے دی ہے جو اس بات کا تعین کرے گی کہ ملزم کو فرار ہونے کا موقع کیسے ملا۔
پولیس نے فرار ہونے والے قیدی تاج محمد کے خلاف بھی الگ سے مقدمہ درج کر لیا ہے اور شہر بھر کے داخلی و خارجی راستوں پر ناکہ بندی کرتے ہوئے اس کی گرفتاری کے لیے چھاپے مارے جارہے ہیں۔
