پاکستان اسٹاک ایکسچینج میں جمعرات کو بھی خریداری کا رجحان برقرار رہا، جہاں بینچ مارک کے ایس ای 100 انڈیکس میں تقریباً 1,400 پوائنٹس کا اضافہ ریکارڈ کیا گیا۔
کاروباری دن کے آغاز پر اسٹیٹ بینک کی جانب سے سعودی عرب سے 2 ارب ڈالر موصول ہونے کی تصدیق اور امریکا–ایران مذاکرات کی ممکنہ بحالی سے متعلق امیدوں نے سرمایہ کاروں کے اعتماد کو تقویت دی۔
یہ بھی پڑھیں:پاکستان کی کوششوں سے امریکا ایران جنگ بندی، عالمی منڈیوں اور پاکستان اسٹاک ایکسچینج میں تاریخی تیزی
اس مثبت فضا کے باعث انڈیکس ایک موقع پر 170,899.16 پوائنٹس کی بلند ترین سطح تک جا پہنچا۔
دن کے اختتام پر کے ایس ای 100 انڈیکس 1,392.01 پوائنٹس یعنی 0.83 فیصد اضافے کے ساتھ 169,911.95 پوائنٹس پر بند ہوا۔
Market Close Update: Positive Today! 🚀
🇵🇰 KSE 100 ended positive by +1,392 points (+0.83%) and closed at 169,912 with trade volume of 405.3 million shares and value at Rs. 33.88 billion. Today's index low was 168,941 and high was 170,899. pic.twitter.com/WoF1YnfF63— Investify Pakistan (@investifypk) April 16, 2026
ماہرین کے مطابق مقامی مارکیٹ میں تیزی کا رجحان برقرار رہا، جس کی بڑی وجہ امریکا–ایران مذاکرات کی ممکنہ بحالی سے جڑی توقعات ہیں۔
جغرافیائی و سیاسی دباؤ میں کمی کے باعث سرمایہ کاروں نے مختلف شعبوں میں بھرپور خریداری کی۔
اہم کمپنیوں میں یو بی ایل، او جی ڈی سی، حبکو، پی پی ایل، اینگرو ہولڈنگز اور ایف ایف سی نے مجموعی طور پر انڈیکس میں 1,013 پوائنٹس کا اضافہ کیا۔
جس سے ظاہر ہوتا ہے کہ بڑی کمپنیوں میں سرمایہ کاری کا رجحان غالب رہا,دوسری جانب انٹربینک مارکیٹ میں پاکستانی روپے کی قدر میں معمولی بہتری آئی اور ڈالر کے مقابلے میں روپے کی قیمت 278.95 پر بند ہوئی۔
کاروباری حجم 972.71 ملین شیئرز رہا جو گزشتہ روز 1,205.84 ملین تھا، جبکہ حصص کی مالیت 59.42 ارب روپے سے کم ہو کر 43.93 ارب روپے رہ گئی۔
یونٹی فوڈز لمیٹڈ 70.58 ملین شیئرز کے ساتھ سرفہرست رہی، اس کے بعد 53.10 ملین شیئرز کے ساتھ کے الیکٹرک لمیٹڈ اور ہیسکول پیٹرول 46.29 ملین شیئرز کے ساتھ نمایاں رہیں۔
جمعرات کو مجموعی طور پر 489 کمپنیوں کے حصص کا کاروبار ہوا، جن میں سے 307 کے شیئرز کی قیمت میں اضافہ، 139 میں کمی جبکہ 43 میں استحکام رہا۔
گزشتہ روز یعنی بدھ کو بھی مارکیٹ میں زبردست تیزی دیکھی گئی تھی، جب کے ایس ای 100 انڈیکس 2,885.10 پوائنٹس یعنی 1.74 فیصد اضافے کے ساتھ 168,519.94 پوائنٹس پر بند ہوا تھا۔
ادھر وفاقی وزیر خزانہ محمد اورنگزیب نے بتایا کہ سعودی عرب نے مزید 3 ارب ڈالر ڈپازٹس دینے کا وعدہ کیا ہے، جس کی ادائیگی آئندہ ہفتے متوقع ہے۔
مزید پڑھیں: اسٹاک مارکیٹ کریش: جنگ کے خدشات یا تیل کی قیمتوں کا دباؤ؟
انہوں نے مزید کہا کہ پہلے سے موجود 5 ارب ڈالر کے سعودی ڈپازٹ کو سالانہ تجدید کے بجائے 3 سال کے لیے بڑھا دیا جائے گا۔
بین الاقوامی سطح پر بھی ایشیائی مارکیٹوں میں تیزی دیکھی گئی، جہاں ایم ایس سی آئی ایشیا پیسیفک انڈیکس میں 0.3 فیصد اور جاپان کے نکی انڈیکس میں 1.5 فیصد اضافہ ہوا۔
امریکا میں بھی ایس اینڈ پی 500 اور نیسڈیک میں بالترتیب 0.8 اور 1.6 فیصد اضافہ ریکارڈ کیا گیا، جس کی بڑی وجہ بینک آف امریکا اور مورگن اسٹینلے کے مثبت مالیاتی نتائج رہے۔
