ہری پور کی حطار انڈسٹریل اسٹیٹ کی مین گیس ٹرانسمیشن لائن میں لیکج کے باعث شدید نوعیت کی آگ بھڑک اٹھی، جس کے بعد علاقے میں ہنگامی صورتحال پیدا ہو گئی، اور 8 افراد جھلس کر جاں بحق جبکہ 5 زخمی ہوگئے۔
انڈسٹری کے قریب مین گیس لائن میں لیکج کے باعث اچانک آگ لگی جو دیکھتے ہی دیکھتے پھیل گئی۔ آگ کے باعث قریبی فیکٹریوں اور رہائشی آبادی کو شدید خطرات لاحق ہوگئے۔
واقعے کی اطلاع ملتے ہی ڈی پی او ہری پور، ڈپٹی کمشنر اور ضلعی انتظامیہ موقع پر پہنچ گئی اور امدادی کارروائیوں کی نگرانی شروع کر دی گئی۔
بعد ازاں ڈپٹی کمشنر ہری پور وسیم احمد نے بتایا کہ آگے لگنے سے 8 افراد جاں بحق اور 5 زخمی ہوئے، جن کا تعلق ایک ہی گھر سے ہے۔
انہوں نے کہاکہ مرنے والوں میں 3 بچے، 2 بچیاں، 2 بزرگ خواتین اور ایک مرد شامل ہے۔
