پنجاب کے ضلع مظفرگڑھ میں جانوروں پر ظلم کا افسوسناک واقعہ سامنے آیا ہے جہاں نامعلوم افراد نے تیز دھار آلے سے ایک گائے کی زبان کاٹ دی۔
پولیس کے مطابق یہ واقعہ مظفرگڑھ کے علاقے لنگر سرائے میں پیش آیا۔ اطلاع ملنے پر متعلقہ اداروں نے موقع پر پہنچ کر واقعے کی تحقیقات شروع کر دیں۔
محکمہ لائیو اسٹاک کا کہنا ہے کہ گائے کی زبان کسی نوکیلے اور تیز دھار آلے سے زخمی کی گئی، جس کے باعث جانور اب چارہ کھانے سے بھی محروم ہو گیا ہے اور شدید تکلیف میں ہے۔
یہ بھی پڑھیے: مخالفین کے گھر اور جانور جلانے کا معاملہ، سپریم کورٹ نے ملزم کی ضمانت قبل از گرفتاری مسترد کر دی
گائے کے مالک نے پولیس کو درخواست دیتے ہوئے ملزمان کے خلاف کارروائی کا مطالبہ کیا ہے۔ مالک کے مطابق اس سے قبل بھی نامعلوم افراد ان کی بکریوں کو نقصان پہنچا چکے ہیں، جس سے علاقے میں خوف و تشویش پائی جاتی ہے۔
یاد رہے کہ اس سے پہلے بھی پنجاب کے مختلف علاقوں میں جانوروں پر تشدد کے واقعات رپورٹ ہو چکے ہیں۔ سرگودھا میں ایک شخص نے مبینہ طور پر چارہ کھانے پر بھینس کی زبان کاٹ دی تھی، جبکہ گھوٹکی میں بھی اسی نوعیت کا واقعہ سامنے آیا تھا۔
شہریوں اور سماجی حلقوں نے واقعے پر شدید غم و غصے کا اظہار کرتے ہوئے ذمہ دار افراد کی فوری گرفتاری اور جانوروں کے تحفظ کے لیے سخت اقدامات کا مطالبہ کیا ہے۔
