بالی ووڈ کی معروف جوڑی دیپیکا پڈوکون اور رنویر سنگھ نے اپنے دوسرے بچے کی خوشخبری سوشل میڈیا پر شیئر کر دی، جس کے بعد مداحوں اور شوبز شخصیات کی جانب سے مبارکبادوں کا سلسلہ شروع ہوگیا۔
جوڑے نے یہ اعلان اپنی بیٹی دعا کے خوبصورت انداز میں ذکر کے ساتھ کیا، جسے مداحوں نے بے حد پسند کیا۔ سوشل میڈیا پر اداکارہ سامنتھا روتھ پربھو اور پرینیتی چوپڑا سمیت کئی ستاروں نے نیک تمناؤں کا اظہار کیا۔
یہ بھی پڑھیے: رنویر سنگھ کے بعدسلمان خان کے بہنوئی کو بھی دھمکی آمیز پیغام موصول
اس سے قبل اداکار جوڑے نے دیوالی کے موقع پر اپنی بیٹی دعا کی پہلی جھلک سوشل میڈیا پر مداحوں کے ساتھ شیئر کر دی تھی۔
انسٹاگرام پر جاری کی گئی تصاویر میں دونوں روایتی بھارتی لباس میں نظر آئے۔ رنویر سنگھ آف وائٹ کرتے اور کوٹ میں دکھائی دیے جبکہ دیپیکا پڈوکون سرخ رنگ کے خوبصورت لباس اور جیولری کے ساتھ نمایاں رہیں۔ ننھی دعا اس موقع پر اپنی والدہ سے ہم آہنگ لباس میں نظر آئیں اور تصاویر میں مسکراتی ہوئی دکھائی دیں۔
View this post on Instagram
تصاویر میں ایک جذباتی منظر بھی شامل تھا جس میں دیپیکا اپنی بیٹی کے ساتھ دیوالی کی پوجا کرتی دکھائی دیں جبکہ رنویر سنگھ دونوں کو گلے لگائے ہوئے نظر آئے۔ فیملی کی یہ جھلک مداحوں کی توجہ کا مرکز بن گئی۔
یہ بھی پڑھیے: ہم نے اوور ورکنگ کو معمول بنا لیا، 8 گھنٹے کا کام کافی: دیپیکا پڈوکون
سوشل میڈیا پر شوبز شخصیات اور مداحوں نے بھی جوڑے کو مبارکباد دی۔ اننیا پانڈے نے جذباتی انداز میں کہا ‘اوہ مائی گاڈ’ جبکہ راجکمار راؤ اور ہنسیکا موتوانی سمیت دیگر فنکاروں نے بھی نیک خواہشات کا اظہار کیا۔
واضح رہے کہ دیپیکا پڈوکون اور رنویر سنگھ نے 2018 میں اٹلی کے شہر لیک کومو میں شادی کی تھی۔ جوڑے کے ہاں پہلی بیٹی دعا 8 ستمبر 2024 کو پیدا ہوئی تھی۔
