بنگلہ دیش کے آرمی چیف جنرل وقار الزمان نے بندربن کے علاقے علیقدم کنٹونمنٹ میں قائم نئے ہل اینڈ جنگل وارفیئر اسکول کا افتتاح کر دیا، جس کا مقصد مشکل جغرافیائی حالات میں فوجی صلاحیتوں کو مزید مضبوط بنانا ہے۔
یہ بھی پڑھیں:بنگلہ دیش فوج کے پرنسپل اسٹاف افسر ایس ایم قمر کی آرمی چیف کے بعد ایڈمرل نوید اشرف سے ملاقات
بنگلہ دیشی فوج کے جاری بیان کے مطابق آرمی چیف جنرل وقارالز زمان نے 18 اپریل کو بندربن ریجن میں واقع علیقدم کنٹونمنٹ کا دورہ کیا جہاں انہوں نے باقاعدہ طور پر نئے قائم کردہ ہل اینڈ جنگل وارفیئر اسکول کا افتتاح کیا۔
حکام کے مطابق یہ جدید تربیتی ادارہ پہاڑی علاقوں اور گھنے جنگلات جیسے مشکل ماحول میں فوج کی آپریشنل صلاحیتوں کو بہتر بنانے کے لیے قائم کیا گیا ہے، تاکہ فوجی روایتی میدانی کارروائیوں کے ساتھ ساتھ دشوار گزار علاقوں میں بھی مؤثر انداز میں فرائض انجام دے سکیں۔
یہ بھی پڑھیں:قومی یومِ شہدائے فوج: بنگلہ دیش حکومت کا انصاف فراہم کرنے کا اعلان
فوجی حکام کا کہنا ہے کہ اس ادارے میں اہلکاروں کو خصوصی تربیت دی جائے گی جس میں جسمانی برداشت، ذہنی مضبوطی اور جنگی حکمت عملی کی مہارتوں کو فروغ دیا جائے گا، تاکہ وہ سخت اور خطرناک حالات میں مؤثر کارکردگی دکھا سکیں۔
افتتاحی تقریب میں اعلیٰ فوجی حکام نے شرکت کی، جن میں آرمی ٹریننگ اینڈ ڈاکٹرائن کمانڈ، انجینئرنگ اور انتظامی شعبوں کے افسران کے علاوہ 24ویں انفنٹری ڈویژن اور چٹاگانگ ایریا کمانڈ کے افسران بھی شامل تھے۔
