جاپان کے اسلام آباد میں قائم سفارت خانے کے مطابق اقوام متحدہ ترقیاتی پروگرام اور حکومتِ جاپان نے پاکستان میں کمیونٹی ریزیلینس اور قدرتی آفات سے نمٹنے کی تیاری بہتر بنانے کے لیے نئی شراکت داری کا آغاز کیا ہے۔ اس منصوبے کے لیے جاپان نے 4 لاکھ امریکی ڈالر فراہم کیے ہیں۔
بیان کے مطابق یہ منصوبہ خاص طور پر پنجاب کے کمزور اور سیلاب سے متاثرہ علاقوں، خصوصاً جنوبی پنجاب، میں نافذ کیا جائے گا۔ پاکستان کو موسمیاتی تبدیلیوں کے باعث بڑھتے ہوئے خطرات، بار بار سیلاب اور دیگر قدرتی آفات کا سامنا ہے، جن سے لاکھوں افراد متاثر ہوئے ہیں جبکہ روزگار، بنیادی ڈھانچے اور ضروری سہولیات کو نقصان پہنچا ہے۔
یہ بھی پڑھیے: وزیراعظم کا جاپانی ہم منصب سے ٹیلیفونک رابطہ، امریکا ایران مذاکرات کی پاکستانی سہولتکاری کی حمایت پر اظہار تشکر
12 ماہ پر مشتمل اس منصوبے سے براہِ راست 3 ہزار افراد مستفید ہوں گے، جن میں خواتین اور نوجوانوں کو ترجیح دی جائے گی۔ منصوبے کے تحت مقامی افراد کو ابتدائی وارننگ نظام، ہنگامی منصوبہ بندی، اور ریسکیو و ابتدائی امدادی اقدامات کی تربیت دی جائے گی۔
پاکستان میں جاپان کے سفیر اکاماتسو شویچی نے کہا کہ جاپان پاکستان کو قدرتی آفات کے مقابلے میں مضبوط بنانے کے لیے پُرعزم ہے، اور یہ منصوبہ مقامی آبادی کو بااختیار بنانے میں مدد دے گا۔
ڈاکٹر سیموئل رزق نے کہا کہ مضبوطی صرف آفات کے بعد ردعمل کا نام نہیں بلکہ ایسے نظام اور صلاحیتوں کی تعمیر بھی ہے جو کمیونٹیز کو مستقبل کے خطرات کا سامنا کرنے کے قابل بنائیں۔
یہ منصوبہ پاکستان میں بحالی اور استحکام کے لیے یو این ڈی پی پاکستان کی وسیع کوششوں کا حصہ ہوگا، جس پر قومی اور صوبائی شراکت داروں کے تعاون سے عمل درآمد کیا جائے گا۔
