پاکستان اسٹاک ایکسچینج میں منگل کے روز شدید مندی کے بعد زبردست بحالی دیکھی گئی، جہاں مثبت معاشی اور سیاسی اشاروں کے باعث سرمایہ کاروں کی دلچسپی دوبارہ بحال ہوتی نظر آئی۔
بینچ مارک کے ایس ای 100 انڈیکس 959 پوائنٹس یعنی 0.56 فیصد اضافے کے ساتھ 173,155.79 پر بند ہوا۔
مارکیٹ نے کاروبار کا آغاز مضبوط انداز میں کیا اور انٹرا ڈے کے دوران انڈیکس 175,298.11 کی بلند سطح تک جا پہنچا، جو جارحانہ خریداری کی عکاسی کرتا ہے۔
یہ بھی پڑھیں: عالمی معیشت میں بہتری: اسٹاک مارکیٹ اور سونے چاندی میں سرمایہ کاری کب کی جائے؟
تاہم بعد میں منافع کے حصول اور محتاط رویے کے باعث مارکیٹ دباؤ میں آگئی اور دوپہر کے وقت انڈیکس 172,837.79 کی کم ترین سطح تک گر گیا۔
کاروبار کے اختتام پر معمولی ریکوری دیکھی گئی، جس نے مجموعی طور پر انڈیکس کو مثبت زون میں بند ہونے میں مدد دی۔
مارکیٹ ماہرین کے مطابق سیشن انتہائی غیر مستحکم رہا، جس کی بڑی وجہ جغرافیائی سیاسی غیر یقینی صورتحال اور ایران و امریکہ مذاکرات سے متعلق خبروں پر سرمایہ کاروں کی توجہ تھی۔
Market Close Update: Positive Today! 🚀
🇵🇰 KSE 100 ended positive by +959.1 points (+0.56%) and closed at 173,155.8 with trade volume of 524.2 million shares and value at Rs. 40.2 billion. Today's index low was 172,838 and high was 175,298. pic.twitter.com/oCNx3NA32M— Investify Pakistan (@investifypk) April 21, 2026
اقتصادی ماہرین کے مطابق سرمایہ کار محتاط رویہ اپنائے ہوئے تھے کیونکہ سفارتی پیش رفت اور کشیدگی کے خطرات دونوں ایک ساتھ موجود تھے۔
میزان بینک، یونائیٹڈ بینک، پاکستان اسٹیٹ آئل، بینک الحبیب، حبیب میٹرو بینک اور اٹک ریفائنری لمیٹڈ جیسے بڑے شیئرز نے مجموعی طور پر 757 پوائنٹس کا اضافہ فراہم کیا، جو اس بات کی نشاندہی کرتا ہے کہ مارکیٹ میں زیادہ تر سرگرمی بڑی کمپنیوں تک محدود رہی۔
پاکستان اسٹاک ایکسچینج میں مجموعی شیئرز کا حجم کم ہو کر 1.16 ارب شیئرز رہا جبکہ کاروباری مالیت 54.94 ارب روپے ریکارڈ کی گئی۔
مزید پڑھیں: اسٹاک مارکیٹ میں 2 فیصد سے زائد اضافہ، سرمایہ کاروں کا اعتماد بحال
سنرجی کو پی کے 83.67 ملین شیئرز کے ساتھ سب سے زیادہ ٹریڈ ہونے والا اسٹاک رہا۔
مجموعی طور پر 489 کمپنیوں میں سے 279 کے شیئرز میں اضافہ، 165 میں کمی جبکہ 45 کمپنیوں کے شیئرز مستحکم دیکھے گئے۔
ایک اہم پیش رفت میں اسٹیٹ بینک نے بتایا کہ سعودی عرب کی وزارت خزانہ سے پاکستان کو 1 ارب ڈالر کی رقم موصول ہوگئی ہے۔ ماہرین کے مطابق یہ پیش رفت مارکیٹ کے لیے ایک مضبوط نفسیاتی سہارا بنی۔
واضح رہے کہ گزشتہ روز یعنی پیر کو مارکیٹ دباؤ کا شکار رہی تھی اور کے ایس ای 100 انڈیکس میں 1742 پوائنٹس کی کمی واقع ہوئی تھی۔
عالمی سطح پر بھی ایشیائی اسٹاک مارکیٹس میں بہتری دیکھی گئی، جہاں ایران اور امریکا کے درمیان ممکنہ امن مذاکرات کی خبروں نے سرمایہ کاروں کے اعتماد کو سہارا دیا۔
مزید پڑھیں: اسٹاک مارکیٹ کریش: جنگ کے خدشات یا تیل کی قیمتوں کا دباؤ؟
جنوبی کوریا کا کوسپی انڈیکس نئی بلند ترین سطح پر پہنچ گیا جبکہ جاپان اور آسٹریلیا کی مارکیٹس میں ملا جلا رجحان رہا۔
پاکستانی روپے نے بھی انٹربینک مارکیٹ میں معمولی بہتری دکھائی اور ڈالر کے مقابلے میں 278.90 پر بند ہوا۔
