امریکی میڈیا نے دعویٰ کیا ہے کہ صدر ٹرمپ نے ایران کے ساتھ جنگ بندی میں توسیع غیر معینہ مدت کے لیے نہیں بلکہ 3 سے 5 روز کے لیے کی ہے۔
امریکی میڈیا نے وائٹ ہاؤس حکام کے حوالے سے رپورٹ کیا ہے کہ امریکی صدر ڈونلڈ ٹرمپ نے ایران کے ساتھ جنگ بندی میں توسیع کو غیر معینہ مدت کے بجائے محدود مدت یعنی 3 سے 5 دن تک رکھنے کا فیصلہ کیا ہے۔
رپورٹس کے مطابق صدر ٹرمپ ایران کو اپنی تجاویز پیش کرنے کے لیے مختصر وقت دینا چاہتے ہیں اور وہ کسی بھی ممکنہ معاہدے کو جلد حتمی شکل دینے کے خواہاں ہیں۔
امریکی میڈیا کا کہنا ہے کہ ٹرمپ کے نزدیک مقررہ ڈیڈ لائن کا دباؤ ایران کو مذاکرات پر آمادہ کرنے میں مددگار ثابت ہو سکتا ہے۔
مزید بتایا گیا ہے کہ امریکی انتظامیہ جنگ بندی کو طویل عرصے تک جاری رکھنے کے حق میں نہیں اور وہ ایران کو بات چیت میں تاخیر کا موقع دینے سے گریز کرنا چاہتی ہے۔
حکام کے مطابق موجودہ حکمت عملی اس بات کی عکاسی کرتی ہے کہ معاملے کو سفارتی طریقے سے حل کرنے کی کوشش کی جا رہی ہے۔
رپورٹ میں یہ بھی کہا گیا ہے کہ امریکی صدر کے خیال میں آبنائے ہرمز کی ناکہ بندی ایران پر دباؤ برقرار رکھنے کا ذریعہ بن سکتی ہے۔
یاد رہے کہ ڈونلڈ ٹرمپ نے گزشتہ روز وزیراعظم شہباز شریف اور فیلڈ مارشل عاصم منیر کی درخواست پر ایران پر حملے روکنے کا اعلان کرتے ہوئے کہا تھا کہ جنگ بندی اس وقت تک جاری رکھی جائے گی جب تک مذاکراتی عمل مکمل نہیں ہو جاتا۔
