سیکیورٹی فورسز اور قانون نافذ کرنے والے اداروں نے خیبر ضلع میں خفیہ اطلاع پر مشترکہ آپریشن کرتے ہوئے 22 خوارج کو ہلاک کر دیا، تاہم شدت پسندوں کی اندھا دھند فائرنگ سے ایک معصوم بچہ شہید ہو گیا۔
یہ بھی پڑھیں:بلوچستان کے ضلع واشک میں سیکیورٹی فورسز کا آپریشن، فتنہ الہندوستان کے 3 دہشتگرد ہلاک
آئی ایس پی آر کے مطابق 21 اپریل 2026 کو خیبر ضلع میں خفیہ اطلاعات کی بنیاد پر مشترکہ کارروائی کی گئی، جس میں سیکیورٹی فورسز اور قانون نافذ کرنے والے اداروں نے حصہ لیا۔
کارروائی کے دوران شدید فائرنگ کا تبادلہ ہوا، جس میں سیکیورٹی فورسز نے مہارت کے ساتھ مقابلہ کرتے ہوئے بھارتی سرپرستی میں سرگرم فتنہ الخوارج سے تعلق رکھنے والے 22 دہشتگردوں کو ہلاک کر دیا۔
آئی ایس پی آر کے مطابق دہشت گردوں نے گرفتاری کے خوف سے اندھا دھند فائرنگ کی، جس کے نتیجے میں 10 سالہ معصوم بچہ شہید ہو گیا۔
ہلاک ہونے والے دہشتگردوں کے قبضے سے اسلحہ اور گولہ بارود بھی برآمد کیا گیا، جبکہ یہ عناصر علاقے میں متعدد دہشت گرد کارروائیوں میں ملوث رہے تھے۔
فوج کے شعبہ تعلقات عامہ کے مطابق علاقے میں مزید دہشت گردوں کی موجودگی کے خدشے کے پیش نظر کلیئرنس آپریشن جاری ہے۔
یہ بھی پڑھیں:اقوام متحدہ کا پاک فوج کی فتنہ الخوارج اور طالبان رجیم کے خلاف کارروائیوں میں عارضی وقفے کا خیرمقدم
بیان میں کہا گیا ہے کہ ’عزمِ استحکام‘ کے تحت سیکیورٹی فورسز اور قانون نافذ کرنے والے ادارے ملک سے بیرونی سرپرستی میں ہونے والی دہشت گردی کے مکمل خاتمے تک اپنی کارروائیاں جاری رکھیں گے، اور معصوم شہریوں کی قربانیاں اس عزم کو مزید مضبوط بناتی ہیں۔
