اداکار دیون بھوجانی نے سپر اسٹار شاہ رخ خان کے ساتھ اپنے کام کے تجربات بیان کرتے ہوئے کہا ہے کہ ابتدا میں وہ ان کے بارے میں پھیلی ہوئی منفی افواہوں سے متاثر تھے اور اسی وجہ سے وہ ان سے ملنے اور سلام کرنے سے بھی ہچکچاتے رہے۔
ایک حالیہ انٹرویو میں دیون بھوجانی نے بتایا کہ جب انہوں نے پہلی بار شاہ رخ خان کے ساتھ کام شروع کیا تو ان کے ذہن میں یہ تاثر تھا کہ وہ مغرور ہیں اور سیٹ پر غصہ کرتے ہیں۔ اس وجہ سے وہ پہلے دن سیٹ پر خود کو متعارف کرانے کے باوجود شاہ رخ سے بات کرنے میں ہچکچا رہے تھے۔
یہ بھی پڑھیں: شاہ رخ خان کے بیٹے آریان خان کی ’جوتا چرائی‘ کی دلچسپ ویڈیو وائرل
انہوں نے بتایا کہ وہ ایک کونے میں اپنے مکالمے یاد کر رہے تھے کہ اچانک شاہ رخ خان خود ان کے پاس آئے، اپنا تعارف کروایا اور ان کے کام کی تعریف کی۔ دیون کے مطابق شاہ رخ نے ان کی فلم ’جو جیتا وہی سکندر‘ میں اداکاری کو سراہا اور بتایا کہ انہوں نے یہ فلم منصور خان کے ساتھ حال ہی میں دیکھی تھی۔
دیون بھوجانی نے کہا کہ اس ملاقات نے ان کے تمام خدشات اور سنی سنائی باتوں کو غلط ثابت کر دیا اور وہ شاہ رخ خان کے نرم مزاج اور خوش اخلاق رویے سے بے حد متاثر ہوئے۔
یہ بھی پڑھیں: شاہ رخ خان نے ‘میڈیکل ایڈوائس’ کے بعد کیریئر سے متعلق بڑا فیصلہ کر لیا
انہوں نے مزید بتایا کہ حالیہ فلم ’ڈنکی‘ کی شوٹنگ کے دوران بھی شاہ رخ خان نے نہایت گرمجوشی اور عزت کے ساتھ پیش آ کر انہیں ایک بار پھر حیران کر دیا۔ ایک سین کی شوٹنگ کے دوران شاہ رخ نے انہیں ’سر‘ کہہ کر مخاطب کیا اور وضاحت کی کہ وہ ایسا اس لیے کر رہے ہیں کیونکہ پوری ٹیم انہیں اسی انداز سے بلاتی ہے۔
دیون کے مطابق شاہ رخ خان کا خاص انداز یہ ہے کہ وہ ہر شخص کو اہم اور خاص محسوس کرواتے ہیں جس کی وجہ سے ان کے ساتھ کام کرنے والے لوگ ان کے گرویدہ ہو جاتے ہیں۔
