ماہرینِ معیشت نے خبردار کیا ہے کہ بنگلہ دیش کی حکومت مرکزی بینک سے نئے نوٹ چھاپ کر قرض لینے پر تیزی سے انحصار کر رہی ہے، جس سے مہنگائی میں مزید اضافہ اور معیشت کو درپیش خطرات بڑھ سکتے ہیں۔
ڈھاکہ میں پالیسی ریسرچ انسٹی ٹیوٹ کے زیرِ اہتمام جمعرات کو منعقدہ ایک سیمینار سے خطاب کرتے ہوئے ماہرین نے کہا کہ یہ رجحان کمزور ریونیو وصولی اور مہنگے قلیل و متوسط مدتی بینک قرضوں پر بڑھتے ہوئے انحصار کی عکاسی کرتا ہے۔
پالیسی ریسرچ انسٹی ٹیوٹ کے چیف اکنامسٹ ڈاکٹر احسن ایچ منصور کے مطابق حکومت نے صرف مارچ میں بنگلہ دیش بینک سے 20 ہزار کروڑ ٹکا قرض لیا۔
یہ بھی پڑھیں: بنگلہ دیش کےعام انتخابات تاریخی موڑ قرار، نئی حکومت کو معاشی چیلنجز کا سامنا
انہوں نے اس رقم کو ‘ہائی پاورڈ منی’ قرار دیا، یعنی ایسا نیا چھاپا گیا پیسہ جو زرِ گردش میں اضافہ کر کے مہنگائی کو بڑھا سکتا ہے۔
انہوں نے کہا کہ گزشتہ 18 ماہ کے دوران بنگلہ دیش کی معیشت نے ایک کمزور بحالی کا مرحلہ دیکھا ہے، تاہم ساختی مسائل کے باعث یہ بہتری پائیدار ثابت نہیں ہو رہی۔
‘رواں مالی سال کی دوسری سہ ماہی میں جی ڈی پی کی شرح نمو کم ہو کر تقریباً 3 فیصد رہ گئی، جو کووڈ-19 کے بعد کی کم ترین سطح ہے۔’
ماہرین نے بینکاری شعبے پر بڑھتے دباؤ پر بھی تشویش کا اظہار کیا، جہاں غیر فعال قرضوں کا حجم تقریباً 30 فیصد تک پہنچنے کی اطلاعات ہیں۔
اس کے نتیجے میں نجی شعبے کو قرضوں کی فراہمی کی شرح 6 فیصد تک گر گئی ہے، جس سے سرمایہ کاری اور کاروباری سرگرمیاں متاثر ہو رہی ہیں۔
سیمینار میں معیشت کو درپیش تین بڑے بیرونی دباؤ کا بھی ذکر کیا گیا، جن میں مشرقِ وسطیٰ میں کشیدگی، بنگلہ دیش کا کم ترقی یافتہ ممالک کی فہرست سے جلد اخراج، اور امریکا کی ٹیرف پالیسیوں سے متعلق غیر یقینی صورتحال شمل تھیں۔
انٹرنیشنل چیمبر آف کامرس بنگلہ دیش کے صدر محبوب الرحمان نے کہا کہ ملک نے اس سے قبل کبھی اتنی طویل مدت تک بلند مہنگائی کا سامنا نہیں کیا۔
مزید پڑھیں: بنگلہ دیش کا غیر ملکی قرض 78 ارب ڈالر سے تجاوز کرگیا
انہوں نے خبردار کیا کہ مزید نوٹ چھاپنے یا سیاسی بنیادوں پر سرکاری اخراجات بڑھانے سے قیمتوں پر دباؤ مزید بڑھے گا۔
انہوں نے کہا کہ کاروباری اعتماد بھی کمزور ہے کیونکہ سرمایہ کاروں کو گیس اور بجلی کی مسلسل فراہمی کے حوالے سے خدشات لاحق ہیں۔
‘اگر مقامی سرمایہ کار پیچھے ہٹیں گے تو غیر ملکی سرمایہ کار بھی ایسا ہی کریں گے۔
مزید پڑھیں: آئی ایم ایف پروگرام میں توسیع، بنگلہ دیش کو مزید مالی سہارا ملنے کی امید
پالیسی ریسرچ انسٹی ٹیوٹ کے چیئرمین زیدی ستار نے کہا کہ آبنائے ہرمز کے گرد عدم استحکام اور مشرقِ وسطیٰ میں جاری تنازع عالمی تجارت اور پیداوار کو متاثر کر سکتا ہے، جس کے اثرات بنگلہ ‘دیش پر بھی پڑیں گے۔
انہوں نے حکومت پر زور دیا کہ وہ 1991 کی طرز پر وسیع اقتصادی اصلاحات متعارف کرائے تاکہ معاشی ترقی کی رفتار بحال ہو اور معیشت کو زیادہ مستحکم بنایا جا سکے۔
تقریب میں شریک حکام اور تجزیہ کاروں نے جرات مندانہ داخلی اصلاحات، بہتر مالیاتی پالیسیوں اور برآمدات میں تنوع پیدا کرنے کی ضرورت پر بھی زور دیا، خصوصاً جہاز سازی کی صنعت کی سرپرستی کی سفارش کی گئی۔
