ایران کے وزیر خارجہ عباس عراقچی کے ہمراہ سرکاری دورے پر جمعے کی شب اسلام آباد پہنچنے والے ایرانی وزارت خارجہ کے ترجمان اسماعیل بقائی کا کہنا ہے کہ پاکستان میں قیام کے دوران یہاں کی اعلیٰ قیادت سے ملاقاتیں متوقع ہیں جن میں دو طرفہ تعلقات اور خطے کی مجموعی صورتحال پر تفصیلی تبادلہ خیال کیا جائے گا۔
سوشل میڈیا پر جاری کیے گئے بیان میں ترجمان نے کہا کہ ان ملاقاتوں میں پاکستان کی جانب سے ثالثی کے پہلوؤں سمیت اہم سفارتی امور بھی زیر بحث آئیں گے جبکہ خطے میں امن و استحکام کے قیام سے متعلق معاملات پر بھی گفتگو کی جائے گی۔
اسماعیل بقائی نے مزید کہا کہ ایران اپنے مؤقف اور حالیہ صورتحال سے متعلق اپنے مشاہدات پاکستانی حکام کے ساتھ شیئر کرے گا تاکہ باہمی تعاون کو فروغ دیا جا سکے۔
مزید پڑھیے: اسلام آباد مذاکرات: جے ڈی وینس امریکا سے صورتحال کی نگرانی کریں گے، وائٹ ہاؤس کا پاکستان کو خراجِ تحسین
آخر میں انہوں نے واضح کیا کہ فی الوقت ایران اور امریکا کے درمیان کوئی میٹنگ طے نہیں ہے اور ایران کے جو مشاہدات و تاثرات ہیں اس سے پاکستان کو آگاہ کردیا جائے گا۔
واضح رہے کہ ایران کے وزیر خارجہ عباس عراقچی مختصر وفد کے ہمراہ جمعے کی شب اسلام آباد پہنچے ہیں جبکہ وائٹ ہاؤس نے تصدیق کی ہے کہ امریکی ایلچی اسٹیو وٹکوف اور جیرڈ کشنر ہفتے کو پاکستان روانہ ہوں گے۔وائٹ ہاؤس ترجمان کیرولین لیوٹ نے میڈیا کو بتایا کہ دونوں امریکی نمائندے پاکستان میں ایرانی وفد کے ساتھ براہ راست مذاکرات کریں گے جن کی میزبانی اور ثالثی پاکستان کر رہا ہے۔
