پاکستان اسٹاک ایکسچینج میں منگل کے روز مندی کا رجحان غالب رہا، جہاں بینچ مارک کے ایس ای-100 انڈیکس شدید فروخت کے دباؤ کے باعث تقریباً 1100 پوائنٹس کی کمی کے ساتھ بند ہوا۔
کاروباری دن کے آغاز پر مارکیٹ میں مثبت رجحان دیکھا گیا اور انڈیکس تیزی سے بڑھتے ہوئے 169,313 پوائنٹس کی انٹرا ڈے بلند ترین سطح تک پہنچ گیا، جو ابتدائی خریداری کے رجحان کو ظاہر کرتا ہے۔
یہ بھی پڑھیں: اسٹاک مارکیٹ بلند ترین سطح پر پہنچ کر مندی سے دوچار، کیا معیشت خطرے میں ہے؟
تاہم یہ تیزی زیادہ دیر برقرار نہ رہ سکی اور جلد ہی منافع خوری کے باعث مارکیٹ میں تیزی سے کمی آنا شروع ہوگئی۔
دوپہر سے قبل ہی انڈیکس میں نمایاں گراوٹ دیکھی گئی اور یہ کم ہو کر 168,170.74 پوائنٹس کی انٹرا ڈے کم ترین سطح تک پہنچ گیا، جو سرمایہ کاروں کے محتاط رویے اور مضبوط مثبت عوامل کی کمی کو ظاہر کرتا ہے۔
Market Close Update: Negative Today! 👇
🇵🇰 KSE 100 ended negative by -1,085.1 points (-0.64%) and closed at 168,412.2 with trade volume of 592.5 million shares and value at Rs. 22.43 billion. Today's index low was 168,171 and high was 169,314. pic.twitter.com/c6YwR7BXNp— Investify Pakistan (@investifypk) April 28, 2026
کاروبار کے اختتام پر کے ایس ای 100 انڈیکس 1,085.12 پوائنٹس یعنی 0.64 فیصد کمی کے ساتھ 168,412.23 پوائنٹس پر بند ہوا۔
ماہرین کے مطابق مارکیٹ میں حالیہ مندی کی بڑی وجہ اسٹیٹ بینک کی جانب سے شرح سود میں غیر متوقع اضافہ ہے۔
مزید پڑھیں: پاکستان اسٹاک ایکسچینج میں شدید اتار چڑھاؤ، انڈیکس میں 1,174 پوائنٹس کی کمی
مرکزی بینک نے پیر کو ہونے والے مانیٹری پالیسی کمیٹی کے اجلاس میں شرح سود 100 بیسس پوائنٹس بڑھا کر 11.50 فیصد کر دی تھی، جس کے بعد سرمایہ کاروں کی توقعات کے برعکس فیصلے نے مارکیٹ کو دباؤ میں ڈال دیا۔
ماہرین کے مطابق مارکیٹ اس فیصلے کے اثرات کو جذب کرنے کے عمل سے گزر رہی ہے اور 11.5 فیصد شرح سود کے ماحول میں خود کو ایڈجسٹ کرنے کے لیے وقت درکار ہوگا۔
گزشتہ روز یعنی پیر کو بھی اسٹاک مارکیٹ میں اتار چڑھاؤ اور مندی کا رجحان دیکھا گیا تھا، جب کے ایس ای 100 انڈیکس 1,174.68 پوائنٹس یعنی 0.69 فیصد کمی کے ساتھ 169,497.36 پوائنٹس پر بند ہوا تھا۔
دوسری جانب عالمی سطح پر ایشیائی اسٹاک مارکیٹس ریکارڈ سطح کے قریب رہیں، جبکہ سرمایہ کار مشرق وسطیٰ کی کشیدہ صورتحال، بڑی کمپنیوں کے مالی نتائج اور مختلف مرکزی بینکوں کے اجلاسوں پر نظر رکھے ہوئے ہیں۔
مزید پڑھیں: امریکا ایران جنگ بند کروا کر پاکستان نے عالمی معیشت کو کتنا فائدہ پہنچایا؟
جاپان کا نکی انڈیکس 0.5 فیصد کمی کا شکار ہوا، جبکہ ایم ایس سی آئی ایشیا پیسیفک انڈیکس معمولی کمی کے ساتھ اپنی بلند ترین سطح کے قریب رہا۔
امریکا اور ایران کے درمیان جاری کشیدگی اور آبنائے ہرمز میں توانائی کی ترسیل میں تعطل بھی عالمی منڈیوں پر اثر انداز ہو رہا ہے، جس سے سرمایہ کاروں میں غیر یقینی صورتحال برقرار ہے۔
