بالی ووڈ کے سینئر اداکار نانا پاٹیکر نے 76 برس کی عمر میں بھی اپنی غیرمعمولی فٹنس سے ایک بار پھر سب کی توجہ حاصل کر لی ہے۔ حال ہی میں سوشل میڈیا پر وائرل ہونے والی ایک ویڈیو میں انہیں Tricep Dips کی مشق باآسانی انجام دیتے ہوئے دیکھا جا سکتا ہے جسے صارفین کی جانب سے بے حد سراہا جا رہا ہے۔
یہ ویڈیو معروف فوٹوگرافر اور پروڈیوسر اتل کاس بیکر نے انسٹاگرام پر شیئر کی جس میں نانا پاٹیکر کو جم میں ورزش کرتے دیکھا جا سکتا ہے۔ ویڈیو میں وہ نہایت روانی کے ساتھ 15 ٹرائی سیپ ڈِپس مکمل کرتے ہیں اور آخر میں مسکراتے ہوئے دکھائی دیتے ہیں۔
View this post on Instagram
اتل کاس بیکر نے ویڈیو کے ساتھ اپنے پیغام میں لکھا کہ نانا پاٹیکر کی اس کارکردگی نے ان کے اپنے فٹنس اہداف کو بھی ازسرِنو ترتیب دینے پر مجبور کر دیا۔ انہوں نے وضاحت کی کہ ویڈیو میں تمام 15 ریپس اس لیے ریکارڈ نہیں ہو سکیں کیونکہ انہوں نے ریکارڈنگ کچھ دیر سے شروع کی تھی۔
ویڈیو کے وائرل ہوتے ہی سوشل میڈیا صارفین کی بڑی تعداد نے نانا پاٹیکر کی جسمانی مضبوطی اور عزم کو سراہا۔ متعدد صارفین نے انہیں ’حقیقی انسپیریشن‘ قرار دیا جبکہ شوبز شخصیات شلپا شیٹی اور راہول دیو نے بھی ان کی تعریف کی۔
واضح رہے کہ نانا پاٹیکر حال ہی میں فلم ’او رومیئو‘ میں جلوہ گر ہوئے جس میں انہوں نے ایک پولیس افسر کا کردار ادا کیا۔ فلم میں ان کے ہمراہ شاہد کپور اور ترپتی ڈمری بھی شامل ہیں۔
