مسلم لیگ ن نے خیبرپختونخوا میں عوام رابطہ مہم تیز کرنے اور پارٹی کی تنظیم نو کا فیصلہ کیا ہے۔
مسلم لیگ (ن) کے قائد میاں محمد نواز شریف کی خصوصی ہدایت پر قائم کردہ اعلیٰ سطحی کمیٹی کا ایک اہم اجلاس اسلام آباد میں منعقد ہوا، جس میں خیبر پختونخوا کی تعمیر و ترقی، سیاسی استحکام اور عوامی خوشحالی کے لیے بڑے فیصلوں کی توثیق کی گئی۔
یہ بھی پڑھیں: معاون خصوصی خیبرپختونخوا کی عظمیٰ بخاری کے خلاف نازیبا زبان، مسلم لیگ ن کا سخت ردعمل
احسن اقبال کی سربراہی میں ہونے والے اس اجلاس میں وفاقی وزرا انجینئر امیر مقام، عطاء اللہ تارڑ اور سینیئر رہنماؤں پرویز رشید اور زاہد خان نے شرکت کی۔ اجلاس کا بنیادی ایجنڈا نواز شریف کے وژن کے مطابق صوبے میں ترقیاتی منصوبوں کی رفتار تیز کرنا اور عوام کے بنیادی مسائل کا حل تلاش کرنا تھا۔
اجلاس کے دوران خیبر پختونخوا کی موجودہ سیاسی صورتحال کا تفصیلی جائزہ لیا گیا اور اس بات پر زور دیا گیا کہ صوبے کے عوام میں پائے جانے والے احساسِ محرومی کو ختم کرنے کے لیے وفاقی حکومت کے تعاون سے بنیادی سہولیات کی فراہمی یقینی بنائی جائے۔
شرکا نے اتفاق کیا کہ صوبے کی ترقی کے لیے ایک مربوط اور جامع حکمت عملی وضع کی جائے گی تاکہ تعلیم، صحت اور انفراسٹرکچر کے شعبوں میں واضح تبدیلی لائی جاسکے۔
یہ بھی پڑھیں: کیا نواز شریف سیاسی منظر نامے پر واپس آ رہے ہیں؟
سیاسی و تنظیمی محاذ پر کمیٹی نے مسلم لیگ (ن) کو خیبر پختونخوا میں ایک مضبوط اور فعال قوت بنانے کے لیے تنظیمی ڈھانچے میں اصلاحات اور کارکنوں کو متحرک کرنے پر غور کیا۔ اجلاس میں فیصلہ کیا گیا کہ صوبے بھر میں عوامی رابطہ مہم کو وسعت دی جائے گی تاکہ پارٹی کا پیغام گھر گھر پہنچایا جا سکے۔
اجلاس کے اختتام پر اس عزم کا اعادہ کیا گیا کہ پارٹی قیادت کی رہنمائی میں خیبر پختونخوا کو ترقی کی راہ پر گامزن کرنا اور عوامی فلاح کو مقدم رکھنا ہی اولین ترجیح رہے گی۔
