وفاقی دارالحکومت اسلام آباد میں پیٹرول کی فراہمی کے حوالے سے شہریوں میں بے چینی پھیل گئی ہے جس پر ضلعی انتظامیہ نے شہریوں کو اہم پیغام دیا ہے۔
یہ بھی پڑھیں: پیٹرول اور ڈیزل کی قیمتوں کے تعین کے فارمولے میں تبدیلی، کیا اثرات ہوں گے؟
ضلعی انتظامیہ نے وضاحت کی کہ شہر کے تمام پیٹرول پمپس پر پیٹرول کا وافر اسٹاک موجود ہے اور پیٹرول کی فراہمی میں کوئی کمی نہیں۔ انتظامیہ کے مطابق کل سے پیٹرول کی عدم فراہمی کے حوالے سے جو خبریں زیر گردش ہیں وہ محض افواہیں ہیں۔
ضلع انتظامیہ کی جانب سے مزید کہا گیا کہ اگر کوئی پیٹرول پمپ آپ کی ضرورت کے مطابق پیٹرول فراہم نہیں کرتا تو فوراً انتظامیہ کو آگاہ کیا جائے۔ شہریوں کو 24 گھنٹے دستیاب کنٹرول روم نمبر 051-9108084 پر رابطہ کرنے کی ہدایت کی گئی ہے۔
ضلعی انتظامیہ نے شہریوں سے اپیل کی ہے کہ وہ پیٹرول کی قلت کے حوالے سے پھیلائی جانے والی افواہوں پر دھیان نہ دیں اور ایسی افواہوں کو مسترد کریں۔
واضح رہے کہ پیٹرول پمپس پر جمعرات کو غیر معمولی ہجوم اس وجہ سے نہیں کہ لوگوں کو آئندہ دنوں میں ایندھن نہ ملنے کا خدشہ ہے بلکہ اصل وجہ یہ ہے کہ رات 12 بجے کے بعد پیٹرول و ڈیزل کی قیمتوں میں اضافے کا امکان ہے۔
مزید پڑھیں: پیٹرولیم مصنوعات کی قیمتوں میں ہوشربا اضافہ، پیٹرول اور ڈیزل کی قیمت میں 26روپے 77پیسے اضافہ
پیٹرول پمپس پر طویل قطاروں میں موجود کچھ لوگوں کا کہنا تھا کہ وہ پیٹرول پمپ پر اس وجہ سے آئے ہیں کہ کل قیمت بہت زیادہ بڑھ گئی تو آج ان کی نسبتاً کچھ بچت ہوجائے گی۔
