پاکستان سپر لیگ (پی ایس ایل) 11 کا فائنل آج رات 8 بجے قذافی اسٹیڈیم لاہور میں کھیلا جائے گا، جس کے لیے پشاور زلمی اور حیدرآباد کنگز مین کی ٹیمیں اسٹیڈیم پہنچ گئی ہیں، اور اختتامی تقریب اب ختم ہوگئی ہے۔
اختتامی تقریب میں معروف فنکار عاطف اسلم، علی عظمت، عارف لوہار، آئمہ بیگ، صابری سسٹر اور دانیا کنول نے اپنی آواز کا جادو جگایا۔
Amazing Gaddafi Stadium atmosphere and a whole lot of fireworks at the HBL PSL 11 Closing Ceremony🎇#HBLPSL11 | #NewEra | #PZvHK pic.twitter.com/wJFHeTtsPe
— PakistanSuperLeague (@thePSLt20) May 3, 2026
اختتامی تقریب کے موقع پر شائقین کرکٹ کی بڑی تعداد اسٹیڈیم میں موجود تھی، جنہوں نے فنکاروں کو داد پیش کی۔
لاہور کے قذافی اسٹیڈیم میں آج پی ایس ایل 11 کا فائنل پشاور زلمی اور حیدرآباد کنگز کے درمیان کھیلا جائے گا، جس میں دونوں ٹیمیں ٹائٹل جیتنے کے لیے مدمقابل ہوں گی۔
پشاور زلمی کے کپتان بابر اعظم کا کہنا ہے کہ ہر کپتان کی خواہش ہوتی ہے کہ وہ ٹرافی اپنے نام کرے اور وہ بھی اسی عزم کے ساتھ میدان میں اتریں گے۔
دوسری جانب حیدرآباد کنگز کے کپتان مارنش لبوشین نے کہا کہ ٹیم نے سخت مقابلے کھیل کر فائنل تک رسائی حاصل کی ہے اور فیصلہ کن میچ میں بھی بہترین کارکردگی دکھائیں گے۔
پی ایس ایل فائنل کا وقت بھی تبدیل کردیا گیا ہے، اب فائنل معرکہ رات 7 بجے کے بجائے 8 بجے شروع ہوگا، دوسری جانب بارش کے خطرات بھی منڈلانے لگے ہیں، جس سے کرکٹ شائقین کی تشویش میں اضافہ ہوگیا ہے۔
پی ایس ایل فائنل کے موقع قذافی اسٹیڈیم کے اطراف کے سیکیورٹی کے سخت انتظامات کیے گئے ہیں، اور بھاری نفری تعینات کی گئی ہے۔
گزشتہ روز وزیراعظم شہباز شریف نے چیئرمین پی سی بی محسن نقوی کو ہدایت کی تھی کی پی ایس ایل فائنل کے موقع پر بہترین انتظامات یقینی بنائے جائیں۔
