مرحوم بھارتی اداکار عرفان خان کی چھٹی برسی کے موقع پر ان کی اور اداکارہ ودیا بالن کی ایک پرانی اور غیر ریلیز شدہ فلم ‘The Last Tenant’ یوٹیوب پر جاری کر دی گئی ہے۔ یہ فلم تقریباً 25 سال سے منظرِ عام سے غائب تھی اور اب پہلی بار ناظرین کے لیے پیش کی گئی ہے۔
تفصیلات کے مطابق یہ فلم 2000 کے آس پاس بغیر کسی بڑے بجٹ کے بنائی گئی تھی اور اس کی ہدایت کاری و تحریر سارتھک داس گپتا نے کی تھی جبکہ اس کی پروڈکشن نیینا اور سارتھک داس گپتا نے مشترکہ طور پر انجام دی۔ فلم میں عرفان خان اور ودیا بالن اپنے کیریئر کے ابتدائی دور میں نظر آتے ہیں جو اسے بھارتی سنیما کی ایک نایاب تاریخی دستاویز بناتی ہے۔
یہ بھی پڑھیں: مرحوم اداکار عرفان خان پردہ سیمیں پر آخری مرتبہ کب نظر آئیں گے؟
یہ فلم نہ صرف عرفان خان اور ودیا بالن کا واحد مشترکہ اسکرین پروجیکٹ ہے بلکہ ودیا بالن کے ابتدائی ترین کام میں بھی شمار کی جاتی ہے جس سے ان کے فنی سفر کی ابتدائی جھلک سامنے آتی ہے۔
فلم کو طویل عرصے تک ریلیز نہیں کیا جا سکا کیونکہ اس کی اصل فوٹیج گم ہو گئی تھی جس کے باعث یہ منصوبہ مکمل ہونے کے باوجود تقریباً دو دہائیوں سے زائد عرصے تک التوا کا شکار رہا۔ تاہم حال ہی میں ہدایت کار کو سارتھک داس گپتا کو ایک VHS کاپی حاصل ہوئی جس کے بعد اس فلم کو بحال کر کے عوامی سطح پر جاری کیا گیا۔
یہ بھی پڑھیں: عرفان خان کی آخری فلم کی شوٹنگ کے دوران کیا ہوا؟ ڈیزائنر نے انکشافات کردیے
سارتھک داس گپتا کے مطابق وہ اس وقت فلم سازی کے ابتدائی مراحل میں تھے اور مکمل طور پر خود سیکھنے کے عمل سے گزر رہے تھے۔ ان کا کہنا تھا کہ یہ فلم ان کے لیے ایک ’بھولا ہوا خواب‘ تھی جسے اب عرفان خان کو خراجِ عقیدت کے طور پر پیش کیا جا رہا ہے۔
فلم کی کہانی ایک ایسے ٹوٹے ہوئے موسیقار کے گرد گھومتی ہے جو بیرون ملک روانگی سے قبل ایک ویران گھر میں پناہ لیتا ہے۔ اس دوران تنہائی، یادیں اور موسیقی ایک علامتی انداز میں ایک دوسرے سے جڑ جاتی ہیں جبکہ کہانی غیر متوقع موڑ اختیار کرتی ہے۔
یہ بھی پڑھیں: بالی ووڈ میں کردار کیسے ملتے ہیں؟ نوازالدین صدیقی کا چونکا دینے والا انکشاف
اداکارہ ودیا بالن نے فلم کی ریلیز پر اپنے ردعمل میں کہا کہ یہ ان کے لیے ایک جذباتی لمحہ ہے کیونکہ یہ ان کے کیریئر کے ابتدائی دنوں کی واحد مشترکہ فلم ہے جو عرفان خان کے ساتھ تھی۔
یہ فلم سارتھک داس گپتا کے پروڈکشن بینر ‘The Salt Inc’ کے تحت جاری کی گئی ہے جس میں انو کھیڈوال، سورو بھ اگروال، سبیا سچی، ستیش کلرا اور دیگر اداکار بھی شامل ہیں۔
یہ بھی پڑھیں: ٹائم میگزین نے بالی ووڈ اداکار رنبیر کپور کو 100 بااثر ترین شخصیات میں شامل کرلیا
یوٹیوب پر ریلیز کے محض تین دن کے اندر فلم کو تقریباً دو لاکھ سے زائد بار دیکھا جا چکا ہے جو ناظرین کی بھرپور دلچسپی اور تجسس کو ظاہر کرتا ہے۔
عرفان خان کے مداحوں کے لیے یہ ریلیز ایک جذباتی موقع کی حیثیت رکھتی ہے جو نہ صرف ان کی فنی یادوں کو تازہ کرتی ہے بلکہ ان کے منفرد اداکاری کے سفر کے ایک کم معروف باب کو بھی منظرِ عام پر لاتی ہے۔
