بھارتی پنجاب کے شہر جالندھر میں پنجاب فرنٹیئر ہیڈکوارٹر آف بارڈر سیکیورٹی فورس کے باہر ایک ایک دھماکا ہوا ہے، جس کے بعد علاقے میں خوف و ہراس پھیل گیا۔
بھارتی میڈیا کے مطابق دھماکا قریباً شام 8 بجے شہر کی مصروف ترین سڑک پر ہوا جو بی ایس ایف ہیڈکوارٹر کو امرتسر نئی دہلی قومی شاہراہ سے ملاتی ہے۔ واقعے کے بعد علاقے میں ٹریفک متاثر ہوئی اور سیکیورٹی ادارے حرکت میں آ گئے۔
مقامی افراد کے مطابق انہوں نے موٹرسائیکل میں اچانک زوردار دھماکے کی آواز سنی جس کے فوراً بعد آگ لگ گئی، اور موٹرسائیکل کے پرزے بکھر گئے۔
پولیس نے پورے علاقے کو گھیرے میں لے لیا جبکہ سینیئر افسران، فرانزک ٹیمیں، ڈاگ اسکواڈ اور بم ڈسپوزل اسکواڈ موقع پر پہنچ کر شواہد اکٹھے کررہے ہیں۔
جالندھر پولیس کمشنر کے مطابق ابتدائی تحقیقات میں کسی تخریب کاری یا دھماکا خیز مواد کے استعمال کے شواہد سامنے نہیں آئے۔ ان کے مطابق واقعے کی وجوہات جاننے کے لیے بی ایس ایف اور فرانزک ٹیمیں مشترکہ طور پر تحقیقات کررہی ہیں۔
انہوں نے بتایا کہ گاڑی کے مالک سے پوچھ گچھ جاری ہے جنہوں نے بتایا کہ گاڑی کی مکینیکل سروس باقی تھی، پولیس ہر پہلو سے معاملے کی جانچ کررہی ہے۔
ایک پولیس اہلکار کے مطابق موٹر سائیکل سوار ڈلیوری کمپنی میں کام کرتا تھا اور وہ بی ایس ایف ہیڈکوارٹر کے باہر گاڑی کھڑی کرکے واپس آ رہا تھا کہ اسی دوران دھماکا ہوا۔
واقعے کے بعد سیکیورٹی اداروں میں تشویش پائی جاتی ہے کیونکہ پنجاب کے وزیر اعلیٰ بھگونت مان کل جالندھر کا دورہ کرنے والے ہیں۔
