پاکستان نے 2 اسپاٹ ایل این جی کارگوز کے لیے پیش کی گئی سب سے کم بولیوں کو منظور کرنے سے انکار کر دیا ہے، جبکہ قطر سے طویل المدتی معاہدے کے تحت نسبتاً کم قیمت پر ایل این جی سپلائی کے امکانات بڑھ گئے ہیں۔
یہ بھی پڑھیں:آبنائے ہرمز کشیدگی: قطر سے ترسیل متاثر، پاکستان کا اسپاٹ ایل این جی خریدنے کا فیصلہ
میڈیا رپورٹ کے مطابق پاکستان ایل این جی لمیٹڈ نے 2 کم ترین بولی دینے والی کمپنیوں بی پی سنگاپور اور ٹوٹل انرجیز گیس اینڈ پاور لمیٹڈ کو آگاہ کر دیا ہے کہ ان کی پیشکشیں قبول نہیں کی گئیں۔
ذرائع کے مطابق یہ فیصلہ اس وقت سامنے آیا ہے جب قطر کی جانب سے پاکستان کو 2 ایل این جی کارگوز کی فراہمی کے مثبت اشارے ملے ہیں، جو آبنائے ہرمز کے راستے پاکستان پہنچائے جا سکتے ہیں۔
رپورٹ میں کہا گیا ہے کہ اس سے قبل خطے کی سیکیورٹی صورتحال اور شپنگ راستوں سے متعلق خدشات کے باعث قطر نے اضافی ایل این جی کارگوز کی فراہمی میں ہچکچاہٹ ظاہر کی تھی، تاہم حالیہ سفارتی پیش رفت کے بعد سپلائی کے امکانات بہتر ہو گئے ہیں۔
