وزیراعلیٰ پنجاب مریم نواز نے راولپنڈی کے کچہری چوک میں ’معرکہ حق اسکوائر‘ کا افتتاح کردیا۔
وزیراعلیٰ پنجاب مریم نواز شریف نے راولپنڈی میں “معرکۂ حق اسکوائر” کا افتتاح کر دیا pic.twitter.com/MnvMh58KJE
— WE News (@WENewsPk) May 10, 2026
یہ منصوبہ کچہری چوک ری ماڈلنگ پراجیکٹ کے تحت تعمیر کیا گیا ہے جس کے تحت 2 فلائی اوور اور 3 انڈر پاسز تعمیر کیے گئے ہیں۔
اس کے علاوہ پیدل چلنے والوں کے لیے پل اور ’معرکہ حق‘ کی یادگار بھی اس منصوبے کا حصہ ہیں۔
منصوبے پر مجموعی طور پر 19 ارب روپے لاگت آئی ہے۔ کچہری چوک فلائی اوور اور انڈر پاس کو ’معرکہ حق فلائی اوور‘ اور ’معرکہ حق انڈر پاس‘ کا نام دیا گیا ہے۔
اینکسی چوک میں تعمیر شدہ انڈر پاس اور فلائی اوور کو ’جناح انڈر پاس‘ اور ’جناح فلائی اوور‘ کے نام سے منسوب کیا گیا ہے۔
وزیراعلیٰ پنجاب مریم نواز نے منصوبے کا افتتاح کرنے کے بعد دعا بھی کرائی۔ بعد ازاں انہوں نے سگنل فری کوریڈور، اوور ہیڈ برج اور دیگر شاہراہوں کا دورہ کیا۔
صوبائی وزیر صہیب احمد بھرتھ نے منصوبے پر تفصیلی بریفنگ دیتے ہوئے بتایا کہ سگنل فری کوریڈور سے روزانہ 2 لاکھ سے زیادہ گاڑیاں گزر سکیں گی۔
انہوں نے کہاکہ ’معرکہ حق اسکوائر‘ میں جدید طرز کا پہلا اسٹیٹ آف دی آرٹ پیدل چلنے کا پل بھی تعمیر کیا گیا ہے۔
حکام کے مطابق روات سے موٹروے تک 25 کلومیٹر طویل سگنل فری کوریڈور کے دو مراحل مکمل ہو چکے ہیں جبکہ تیسرا مرحلہ جلد مکمل کیا جائے گا۔
اس منصوبے کے تحت مجموعی طور پر 9 انڈر پاسز اور 3 فلائی اوورز تعمیر کیے جائیں گے، جبکہ ریس کورس، چیئرنگ کراس اور اے ایف آئی سی چوک میں بھی انڈر پاسز بنائے جائیں گے۔
وزیراعلیٰ پنجاب مریم نواز نے کہاکہ یہ سگنل فری کوریڈور راولپنڈی کے شہری ڈھانچے کو بدل دے گا اور شہریوں کو جدید اور بہتر سفری سہولیات فراہم کرے گا۔
