سپریم کورٹ نے حق مہر میں دی گئی جائیداد کی منتقلی سے متعلق اہم قانونی اصول طے کردیا۔
قرار دیا ہے کہ مشترکہ جائیداد کا کوئی بھی حصہ دار اپنے موروثی حصے سے زیادہ جائیداد منتقل نہیں کر سکتا۔
سپریم کورٹ نے اپنے فیصلے میں واضح کیا کہ شوہر مشترکہ جائیداد میں صرف اپنے حصے کی حد تک ہی حق مہر دے سکتا ہے۔
یہ بھی پڑھیں: سپریم کورٹ کا نکاح نامہ میں اہم تبدیلیوں کا حکم، جہیز اور حق مہر کے لیے کالم شامل ہوں گے
سپریم کورٹ نے پشاور ہائیکورٹ کے فیصلے کے خلاف دائر سول پٹیشن بھی خارج کر دی، تحریری فیصلہ جسٹس شکیل احمد نے جاری کیا۔
عدالتی فیصلے کے مطابق پورے گھر یا مکمل جائیداد کو حق مہر میں دینے کا دعویٰ دیگر قانونی ورثاء کے حقوق پر اثر انداز نہیں ہو سکتا۔
عدالتِ عظمیٰ نے نکاح رجسٹرارز اور نکاح خواں حضرات کو ہدایت کی ہے کہ وہ حق مہر میں درج جائیداد کی ملکیت کی مکمل تصدیق کریں تاکہ بعد ازاں قانونی تنازعات اور غیر ضروری مقدمات سے بچا جا سکے۔
مزید پڑھیں: جام مہتاب حملہ کیس، سپریم کورٹ نے ملزمان کی ضمانت کی توثیق کر دی
فیصلے میں یہ بھی حکم دیا گیا ہے کہ نکاح نامے میں جائیداد کی ملکیت سے متعلق ایک علیحدہ کالم شامل کیا جائے، تاکہ حق مہر کے طور پر درج کی جانے والی جائیداد کی قانونی حیثیت واضح رہے۔
عدالت نے فیصلے کی نقل تمام صوبوں کے چیف سیکرٹریز کو ضروری کارروائی اور عملدرآمد کے لیے بھجوانے کی ہدایت بھی جاری کر دی۔
