رکن قومی اسمبلی اسامہ اشفاق سرور نے کہا ہے کہ آنے والے وقت میں پاکستان اور سعودی عرب مشترکہ طور پر پوری مسلم امت کی قیادت کریں گے۔
’وی نیوز‘ سے گفتگو کرتے ہوئے اسامہ اشفاق سرور نے دونوں ممالک کے تعلقات کو مثالی قرار دیتے ہوئے کہا کہ پاکستان اور سعودی عرب کے درمیان اسٹریٹجک معاہدہ موجود ہے اور اب سعودی عرب مسلم طاقتوں کو ایک پلیٹ فارم پر اکٹھا کر کے عالمی سطح پر بڑی تبدیلی لانا چاہتا ہے۔
یہ بھی پڑھیں: پاکستان سعودی عرب کی خودمختاری کے لیے ہمیشہ ساتھ کھڑا رہے گا، پاکستانی سفیر احمد فاروق
اسامہ اشفاق سرور نے اس عزم کا اظہار کیا کہ آنے والا وقت سعودی عرب کی قیادت کا ہے اور ہم عالمی طاقتوں پر واضح کریں گے کہ ان دونوں ممالک کی عالمی سیاست میں کیا اہمیت ہے۔
انہوں نے خطے میں امن کے قیام کے لیے دونوں ممالک کے کردار کو کلیدی قرار دیتے ہوئے کہا کہ پاکستان اور سعودی عرب بہت سی قربانیاں دے کر امریکہ اور ایران کو امن کی راہ پر لانے کی کوشش کر رہے ہیں۔
ان کا کہنا تھا کہ لڑائی کسی مسئلے کا حل نہیں بلکہ تمام تنازعات کا حل صرف مذاکرات کی میز پر بیٹھ کر ہی نکالا جا سکتا ہے۔
یہ بھی پڑھیں: پاکستان سعودی عرب معاہدہ کیا کچھ بدل سکتا ہے؟
رکن قومی اسمبلی نے معاشی استحکام کو بات چیت سے مشروط کرتے ہوئے کہا کہ اس وقت دنیا بھر میں پیٹرول، بجلی اور اشیائے خورونوش کے مسائل جنگوں اور تنازعات کی وجہ سے پیدا ہوئے ہیں، جس سے ہر ملک متاثر ہو رہا ہے۔
انہوں نے عالمی برادری پر زور دیا کہ وہ پاکستان اور سعودی عرب کی کوششوں کی حمایت کرے اور امریکہ و ایران کو جنگ بندی پر راضی کرے تاکہ خطے میں پائیدار امن بحال ہو سکے۔
