سعودی عرب کے دارالحکومت ریاض میں پبلک ٹرانسپورٹ کے نظام کو مزید وسعت دیتے ہوئے رائل کمیشن فار ریاض سٹی نے ریاض میٹرو کے ویسٹرن اسٹیشن کو مکمل طور پر فعال کردیا گیا ہے۔
اس پیشرفت کے ساتھ ہی مذکورہ میٹرو کے چاروں مرکزی اور نمایاں اسٹیشنز مکمل ہو گئے ہیں۔
سعودی پریس ایجنسی کے مطابق جمعہ کے روز عوام کے لیے کھولے جانے والا ویسٹرن اسٹیشن ریاض میٹرو کے 4 اہم اور منفرد اسٹیشنز میں سب سے بڑا ہے۔
یہ بھی پڑھیں: ریاض میٹرو منصوبے کا افتتاح، سعودی عرب کے ٹرانسپورٹ نظام میں انقلابی قدم
دیگر مرکزی اسٹیشنز میں کنگ عبداللہ فائنانشل ڈسٹرکٹ اسٹیشن، ایس ٹی سی العلیا اسٹیشن اور قصر الحکم اسٹیشن شامل ہیں۔
112 ہزار مربع میٹر رقبے پر محیط اس جدید اسٹیشن کو وسعت اور ماحولیاتی پائیداری کو مدنظر رکھتے ہوئے تعمیر کیا گیا ہے۔
دوسری جانب اسے توانائی کے مؤثر استعمال اور ماحولیاتی کارکردگی پر لیڈرشپ اِن انرجی اینڈ انوائرمنٹل ڈیزائن گولڈ سرٹیفکیشن بھی حاصل ہوئی ہے۔
"مشاريع العاصمة".. الخيال يتحقق على الواقع
بدء تشغيل المحطة الغربية آخر محطات المرحلة الأولى في مشروع قطار الرياض دخولا في الخدمة
عبر مراسل الإخبارية عبدالرحمن الأحمدي pic.twitter.com/CHKQIuYyl8
— قناة الإخبارية (@alekhbariyatv) May 14, 2026
ویسٹرن اسٹیشن میں تجارتی مراکز، 550 نمازیوں کی گنجائش والی مسجد، عوامی سہولیات اور 600 سے زائد گاڑیوں کی پارکنگ کی سہولت فراہم کی گئی ہے۔
یہ اسٹیشن ایک گھنٹے میں 60 ہزار سے زائد ٹرین مسافروں اور 1300 بس مسافروں کو سنبھالنے کی صلاحیت رکھتا ہے۔
اپنے اسی وصف کی وجہ سے یہ ریاض کے مختلف علاقوں اور اہم مقامات کو آپس میں ملانے والا ایک بڑا ٹرانسپورٹ حب بن گیا ہے۔
مزید پڑھیں: بہتر طرز زندگی کی تلاش، سعودی عرب منتقل ہونے کے رحجان میں اضافہ
ریاض کے جنوب مغربی علاقے دھرت البدیعہ میں واقع یہ اسٹیشن ریاض میٹرو کی اورنج لائن پر قائم ہے، جو مغربی جانب جدہ روڈ اسٹیشن اور طویق کو مشرقی علاقے خشم العان سے ملاتی ہے۔
ویسٹرن اسٹیشن کا افتتاح ریاض میں مربوط شہری انفرااسٹرکچر کی تیز رفتار ترقی کی عکاسی کرتا ہے۔
دوسری جانب یہ سعودی وژن 2030 کے ان اہداف کا بھی حصہ ہے جن میں معیارِ زندگی بہتر بنانا، نقل و حرکت میں آسانی پیدا کرنا اور نجی گاڑیوں پر انحصار کم کرنا شامل ہیں۔
