جنوبی فرانس میں ایک کروز شپ ‘ایمبیشن’ پر سوار تقریباً 1700 مسافروں کو اس وقت جہاز پر ہی روک لیا گیا جب درجنوں افراد میں معدے کی بیماری کی علامات ظاہر ہوئیں۔ حکام نے احتیاطی تدابیر کے طور پر مسافروں کے اترنے پر پابندی لگا دی ہے۔
یہ بھی پڑھیں: کروز شپ میں ہنٹا وائرس کی تشویشناک وبا، یہ بیماری کیا ہے اور کیسے پھیلتی ہے؟
فرانسیسی محکمہ صحت کے مطابق اب تک تقریباً 50 مسافروں میں شدید ‘گیسٹرو اینٹرائٹس’ سے ملتی جلتی علامات رپورٹ ہوئی ہیں۔ متاثرہ افراد کا طبی معائنہ کر کے انہیں ان کے کیبنز میں الگ تھلگ (آئسولیٹ) کر دیا گیا ہے تاکہ بیماری کو مزید پھیلنے سے روکا جا سکے۔
کروز کمپنی ‘ایمبیسڈر کروز لائن’ نے تصدیق کی ہے کہ 14 روزہ سفر کے دوران کچھ مہمانوں اور عملے کے ارکان کی طبیعت خراب ہوئی۔ کمپنی کا کہنا ہے کہ جہاز پر صفائی ستھرائی اور جراثیم کش ادویات کے چھڑکاؤ کے سخت پروٹوکولز فوری طور پر نافذ کر دیے گئے ہیں۔
یہ بھی پڑھیں: پرتعیش بحری جہاز کا سیاحتی سفر مہلک ہنٹا وائرس کا شکار ہوکر سانحے میں تبدیل کیسے ہوا؟
اسی دوران جہاز پر ایک 92 سالہ مسافر کے انتقال کی خبر بھی سامنے آئی ہے، تاہم کمپنی کا دعویٰ ہے کہ اس موت کا حالیہ بیماری کے پھیلاؤ سے کوئی تعلق نظر نہیں آتا۔ طبی ماہرین اس وقت بورڈو یونیورسٹی اسپتال میں ٹیسٹ کر رہے ہیں تاکہ بیماری کی اصل وجہ معلوم کی جا سکے۔
حکام نے واضح کیا ہے کہ اس واقعے کا کسی دوسرے وائرس یا گذشتہ ماہ رپورٹ ہونے والے ہنٹا وائرس کے کیسز سے کوئی تعلق نہیں ہے۔ یہ بحری جہاز رواں ماہ کے آغاز میں بیلفاسٹ اور لیورپول سے فرانس اور اسپین کے سفر پر روانہ ہوا تھا۔
