پاکستانی شوبز انڈسٹری کی معروف اداکارہ میرا نے اپنے کیریئر اور ذاتی تجربات پر کھل کر بات کرتے ہوئے کہا ہے کہ وہ چاہتی ہیں کہ انہیں ان کی محنت، فن اور لگن کے ذریعے پہچانا جائے نہ کہ کسی قسم کے تنازعات کے ذریعے۔
ایک حالیہ پوڈکاسٹ میں صحافی ہارون رشید سے گفتگو کرتے ہوئے اداکارہ نے بتایا کہ انہوں نے اپنی زندگی میں بے شمار مشکلات کا سامنا کیا لیکن ہمیشہ اپنے خاندان کی کفالت اور کیریئر کو مضبوط بنانے کے لیے مسلسل جدوجہد کی۔ ان کے مطابق وہ سمجھتی ہیں کہ ان کی محنت اور فنی خدمات کو وہ احترام نہیں ملا جس کی وہ حقدار ہیں۔
View this post on Instagram
میرا نے کہا کہ بعض اوقات انہیں محسوس ہوتا ہے کہ میزبانوں اور ناظرین کی جانب سے ان کے ساتھ مناسب رویہ نہیں رکھا جاتا جو ان کے لیے دل آزاری کا باعث بنتا ہے۔ ان کا کہنا تھا کہ وہ اپنی پہچان اپنے کام سے بنانا چاہتی ہیں نہ کہ میڈیا میں زیر بحث رہنے والے تنازعات سے۔
اداکارہ نے اس بات پر زور دیا کہ ان کا مقصد ہمیشہ اپنے فن کے ذریعے ناظرین کے دل جیتنا رہا ہے اور وہ نہیں چاہتیں کہ ان کا نام منفی خبروں یا تنازعات کے ساتھ جوڑا جائے۔
