بجلی کے بھاری بلوں سے تنگ عوام کے لیے خوشخبری، قیمت میں کمی کا امکان

بجلی کے بھاری بلوں سے تنگ عوام کے لیے حوصلہ افزا خبر سامنے آئی ہے۔ ملک بھر کے کروڑوں صارفین کے لیے سہ ماہی ایڈجسٹمنٹ کے تحت بجلی کی قیمت میں کمی کا امکان پیدا ہو گیا ہے۔

میڈیا رپورٹس کے مطابق بجلی کی تقسیم کار کمپنیوں (ڈسکوز) کی جانب سے دائر کردہ ریلیف درخواست پر کل نیشنل الیکٹرک پاور ریگولیٹری اتھارٹی (نیپرا) میں حتمی سماعت ہوگی، جس کے بعد صارفین کو بجلی کے شعبے میں نمایاں ریلیف ملنے کی توقع ہے۔

دستاویزات کے مطابق ڈسکوز نے جنوری تا مارچ 2026 کی سہ ماہی ایڈجسٹمنٹ کے لیے نیپرا سے رجوع کرتے ہوئے مجموعی طور پر 63 ارب 94 کروڑ روپے کا ریلیف صارفین تک منتقل کرنے کی درخواست کی ہے۔

درخواست میں مختلف مدات کے تحت کمی کی استدعا کی گئی ہے، جن میں سب سے بڑی کمی کیپسٹی چارجز کی مد میں 36 ارب 84 کروڑ روپے کی ہے۔

اسی طرح سسٹم استعمال چارجز اور مارکیٹ آپریشن فیس میں 11 ارب 24 کروڑ روپے جبکہ انکریمنٹل یونٹس کی مد میں 23 ارب 51 کروڑ روپے کے ریلیف کی درخواست شامل ہے۔

توانائی کے ماہرین کے مطابق یہ ممکنہ ریلیف بین الاقوامی مالیاتی فنڈ (آئی ایم ایف) کی شرائط کے مطابق ہے، جس کے تحت پاکستان کے انرجی سیکٹر میں بجلی کے نرخ کو لاگت کی وصولی کی سطح پر برقرار رکھنے پر زور دیا جاتا ہے، یعنی بجلی کی قیمت پیداوار کی اصل لاگت کے مطابق ہی مقرر کی جائے۔

رپورٹ کے مطابق جنوری تا مارچ 2026 کے دوران کوئلے، گیس اور ہائیڈل ذرائع سے بجلی کی پیداوار بہتر رہنے اور عالمی منڈی میں ایندھن کی قیمتوں میں اتار چڑھاؤ کے باعث بجلی کی مجموعی پیداواری لاگت میں کمی ریکارڈ کی گئی ہے، جس کے نتیجے میں سہ ماہی ایڈجسٹمنٹ میں ٹیرف میں کمی ناگزیر قرار دی جا رہی ہے۔

ماہرین کے مطابق اگر 63 ارب 94 کروڑ روپے کا یہ ریلیف صارفین تک منتقل ہوتا ہے تو یہ نہ صرف گھریلو بلوں میں کمی کا باعث بنے گا بلکہ صنعتی اور تجارتی شعبے کو بھی سستی بجلی فراہم ہوگی، جس سے پیداواری لاگت میں کمی اور مہنگائی پر دباؤ کم ہونے کی توقع ہے۔

تاہم بجلی کی فی یونٹ قیمت میں حتمی کمی کا فیصلہ نیپرا کل ہونے والی سماعت میں تمام تکنیکی پہلوؤں کا جائزہ لینے کے بعد کرے گا۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں