پاکستان کے نوجوان کھلاڑی چین کے شہر پانژیہوا میں ہونے والی 33ویں ایشین جونیئر انفرادی اسکواش چیمپیئن شپ 2026 میں شرکت کے لیے مکمل تیار ہیں۔ پاکستان اسکواش فیڈریشن کے مطابق یہ معتبر ایونٹ 20 سے 24 مئی تک جاری رہے گا۔ قومی دستے کی قیادت ڈائریکٹر اکیڈمیز گروپ کیپٹن (ر) عرفان اصغر اور ہیڈ کوچ فہیم گل کررہے ہیں۔
یہ بھی پڑھیں: پاکستان اسکواش کے میدان پر پھر چھا گیا، ماہ نور علی اور سہیل عدنان نے اسکاٹش جونیئر اوپن جیت لی
پاکستانی اسکواڈ میں5 لڑکے اور 2 لڑکیاں شامل ہیں جو مختلف عمر کے زمروں میں ایشیا کے ابھرتے ہوئے بہترین کھلاڑیوں کا مقابلہ کریں گے۔ بوائز مقابلوں میں عبداللہ نواز انڈر 19، نعمان خان انڈر 17، جبکہ احمد ریان خلیل اور سہیل عدنان انڈر 15 کیٹیگری میں حصہ لیں گے۔ انڈر 13 کے زمرے میں مصطفیٰ خان ملک کی نمائندگی کرتے ہوئے اپنی صلاحیتیں دکھائیں گے۔
گرلز مقابلوں میں سحرش علی اور ماہ نور علی انڈر 15 کیٹیگری میں پاکستان کی جانب سے میدان میں اتریں گی۔ اس چیمپیئن شپ کو ایشیا کے اہم ترین جونیئر مقابلوں میں شمار کیا جاتا ہے جو نوجوان کھلاڑیوں کو عالمی تجربہ فراہم کرتا ہے۔ یہ پلیٹ فارم کھلاڑیوں کے لیے براعظمی رینکنگ بہتر بنانے کا ایک بہترین موقع بھی ثابت ہوگا۔
یہ بھی پڑھیں: نور زمان اسکواش کے ٹاپ 30 کھلاڑیوں میں شامل، خواتین سمیت دیگر پاکستانیوں کی رینکنگ میں بھی اضافہ
اسکواش فیڈریشن کے حکام نے نوجوان کھلاڑیوں کی تیاری پر مکمل اعتماد کا اظہار کیا ہے۔ ان کا کہنا ہے کہ یہ دستہ بہترین فارم میں ہے اور امید ہے کہ وہ شاندار کارکردگی دکھا کر اسکواش کی دنیا میں پاکستان کی بالادستی برقرار رکھیں گے۔ قومی ٹیم ان مقابلوں میں ٹائٹلز جیتنے کے لیے پرعزم ہے۔
