آزاد کشمیر کے دارالحکومت مظفرآباد کے علاقے گوجرہ میں ایک تعلیمی ادارے کے پرنسپل حمزہ برہان قاتلانہ حملے میں شدید زخمی ہوگئے ہیں، پولیس نے مبینہ ملزم کو گرفتار کرلیا۔
عینی شاہدین کے مطابق صبح کے وقت ہونے والے اس حملے کے نتیجے میں 3 ایمز کالج کے پرنسپل حمزہ برہان کو سر میں 3گولیاں لگیں، جس کے بعد انہیں فوری طور پر سی ایم ایچ مظفرآباد منتقل کیا گیا، جہاں وہ اس وقت وینٹی لیٹر پر ہیں اور ان کی حالت تشویشناک بتائی جارہی ہے۔
دوسری جانب مظفرآباد پولیس نے فائرنگ کرنے والے مبینہ حملہ آور کو گرفتار کر لیا ہے اور اس سے تفتیش کی جارہی ہے۔ پولیس کا کہنا ہے کہ مکمل تحقیقات کے بعد باقاعدہ اعلامیہ جاری کیا جائے گا، جس میں یہ واضح کیا جائے گا کہ گرفتار ملزم کا تعلق کس تنظیم سے ہے اور اس نے کس کے کہنے پر یہ حملہ کیا۔
دورانِ تلاشی پولیس کو زخمی پرنسپل کی گاڑی سے ایک کلاشنکوف بھی برآمد ہوئی ہے، جسے تحویل میں لے لیا گیا ہے۔
مقامی حکام کا کہنا ہے کہ جب تک پولیس اور انتظامیہ اپنی تفتیش مکمل نہیں کر لیتے، اس وقت تک حتمی طور پر کچھ کہنا قبل از وقت ہو گا کہ حملہ آور کون تھا اور اس نے کس مقصد یا کس کے اشارے پر حمزہ برہان کو نشانہ بنایا۔
