پاکستان کسٹمز نے اسمگلنگ کے خلاف مختلف شہروں میں بڑے پیمانے پر کارروائیاں کرتے ہوئے 78 نان کسٹم پیڈ لگژری گاڑیاں، درجنوں ہیوی بائیکس اور کروڑوں روپے مالیت کا غیر ملکی سامان ضبط کر لیا۔
میڈیا رپورٹ مطابق ملک بھر میں جاری کریک ڈاؤن کے دوران متعدد گوداموں، مارکیٹوں اور ٹرانسپورٹ گاڑیوں کی تلاشی لی گئی، جہاں سے غیر ملکی پرفیومز، کاسمیٹکس، خوردنی اشیاء اور دیگر اسمگل شدہ سامان برآمد ہوا۔
یہ بھی پڑھیں:عیدالاضحیٰ پر ریلوے کا خصوصی انتظام، 3 خصوصی ریل گاڑیاں چلانے کا فیصلہ
حکام نے بتایا کہ اسمگل شدہ ہیوی بائیکس کے خلاف بھی خصوصی کارروائی کی گئی، جس کے دوران 40 موٹر سائیکلیں قبضے میں لے لی گئیں۔ اس کے علاوہ موٹر وے پر لاہور جانے والے ٹرکوں کی چیکنگ کے دوران جعلی سگریٹس کی بڑی کھیپ بھی پکڑی گئی۔
کسٹمز کے مطابق ضبط کیے گئے سامان اور نان کسٹم پیڈ گاڑیوں کی مجموعی مالیت تقریباً 715 ملین روپے ہے، جبکہ نوشہرہ میں ہونے والی الگ کارروائی میں 71 ملین روپے مالیت کا سامان اور گاڑیاں برآمد کی گئیں۔
حکام کا کہنا ہے کہ دو ٹرکوں سے غیر ملکی کپڑا بھی برآمد کیا گیا، جس کی مالیت تقریباً 30 ملین روپے بتائی جا رہی ہے۔ پاکستان کسٹمز نے اسمگلنگ کے خلاف کارروائیاں مزید تیز کرنے کا عندیہ بھی دیا ہے۔
