لاہور میں پولیس اہلکاروں کی جانب سے شہریوں سے زبردستی عیدی وصول کرنے کا انوکھا واقعہ سامنے آیا ہے، جس پر متعلقہ اہلکاروں کے خلاف پنجاب ویگرینسی آرڈیننس 1958 کے تحت بھیک مانگنے کا مقدمہ درج کر لیا گیا ہے۔
یہ بھی پڑھیں:اسلام آباد پولیس کے سابق ایس پی کو سزائے موت سنا دی گئی
پولیس کے مطابق واقعہ تھانہ شاہدرہ کے علاقے برکت ٹاؤن پُل کے قریب پیش آیا جہاں ناکہ لگا کر تعینات پولیس اہلکاروں نے شہریوں اور گاڑی سوار افراد کو روک کر عیدی کے نام پر رقم وصول کی۔ کارروائی کے دوران ایک شہری نے الزام عائد کیا کہ اسے زبردستی روکا گیا اور عیدی کے نام پر 6500 روپے لیے گئے۔
ایف آئی آر کے مطابق سب انسپکٹر کی مدعیت میں درج مقدمے میں متعدد پولیس اہلکاروں کو نامزد کیا گیا ہے جن میں کنسٹیبل بشارت، حسین گل، محمد شاہد، علی مرتضیٰ اور محمد ریحان شامل ہیں۔
یہ بھی پڑھیں:کوئٹہ، پولیس اہلکار پر برسرعام تشدد کرنے والے بااثر ملزم کیخلاف مقدمہ درج، گرفتاری کے لیے چھاپے
پولیس حکام کا کہنا ہے کہ اہلکاروں کی جانب سے اختیارات کے ناجائز استعمال اور شہریوں سے زبردستی رقم لینے کی شکایات موصول ہونے کے بعد کارروائی کی گئی۔ مقدمہ درج کر کے معاملہ مزید تفتیش کے لیے انویسٹی گیشن ونگ کے حوالے کر دیا گیا ہے۔
