سینئر اداکارہ شائستہ جبین نے معروف اداکار فردوس جمال کی جانب سے سینئر فنکاروں پر کی گئی حالیہ تنقید کو نامناسب قرار دیتے ہوئے کہا ہے کہ ایک اچھا اداکار ہونا اور ایک اچھا انسان ہونا دو الگ چیزیں ہیں۔ انہوں نے طلعت حسین اور عابد علی جیسے لیجنڈ فنکاروں کے دفاع میں کہا کہ برسوں کی محنت سے بنائی گئی ان کی عزت اور مقام کو کوئی ختم نہیں کر سکتا۔
سینئر اداکارہ شائستہ جبین نے حالیہ دنوں میں سینئر فنکاروں کے بارے میں متنازع بیانات دینے والے اداکار فردوس جمال پر کھل کر تنقید کرتے ہوئے کہا ہے کہ ان کی گفتگو حد سے تجاوز کر چکی ہے۔
شائستہ جبین نے ایک مارننگ شو میں گفتگو کرتے ہوئے نہ صرف فردوس جمال کے حالیہ ریمارکس پر ردعمل دیا بلکہ شوبز انڈسٹری میں پیشہ ورانہ رویوں، سینئر فنکاروں کے احترام اور دیگر مسائل پر بھی اظہارِ خیال کیا۔
یہ بھی پڑھیے اداکارہ حیا خان ہمیشہ والدہ کو ساتھ کیوں رکھتی ہیں؟
یاد رہے کہ فردوس جمال نے ایک پوڈکاسٹ انٹرویو میں کئی معروف فنکاروں سے متعلق تنقیدی تبصرے کیے تھے۔ انہوں نے مبینہ طور پر طلعت حسین کے کام کو ’کم متاثر کن‘ قرار دیا جبکہ عابد علی کو ’خود غرض ٹائپ اداکار‘ کہا، جس کے بعد شوبز حلقوں میں شدید ردعمل سامنے آیا۔
مارننگ شو میں گفتگو کرتے ہوئے شائستہ جبین نے کہا، ’میں ان کے ساتھ کام نہیں کرتی اور نہ آئندہ کبھی کروں گی۔ ہماری کبھی اچھی نہیں بنی۔: انہوں نے مزید کہا کہ اگرچہ فردوس جمال ایک باصلاحیت اداکار ہیں، لیکن ’ایک اچھا اداکار اور ایک اچھا انسان ہونا دو مختلف چیزیں ہیں۔‘
اپنے ذاتی تجربے کا ذکر کرتے ہوئے اداکارہ نے بتایا، ’جب آخری بار ان کے ساتھ کام کیا تو میں نے وہیں الوداع کہہ دیا تھا۔‘
شائستہ جبین نے یہ بھی کہا کہ فردوس جمال اکثر خواتین سے متعلق نامناسب گفتگو کرتے تھے، جو انہیں ناگوار گزرتی تھی۔ ان کے بقول، ’ان کی زبان پر کوئی فلٹر نہیں۔ مجھے نہیں معلوم کہ وہ خواتین کا احترام کرنا جانتے بھی ہیں یا نہیں۔ انہوں نے میرے بارے میں تو کچھ نہیں کہا، لیکن دوسری خواتین کے بارے میں میرے سامنے باتیں کرتے تھے، جو مجھے بہت بری لگتی تھیں۔‘
انہوں نے واضح کیا کہ وہ خواتین کے خلاف توہین آمیز گفتگو برداشت نہیں کر سکتیں۔
سینئر فنکاروں کے دفاع میں شائستہ جبین نے کہا کہ جن اداکاروں پر تنقید کی گئی، انہوں نے برسوں کی محنت اور لگن سے اپنا مقام بنایا ہے۔ ’یہ ان کا ذاتی برتری کا احساس ہو سکتا ہے، مگر وہ ان فنکاروں کی عزت اور شہرت ختم نہیں کر سکتے۔‘
طلعت حسین کا ذکر کرتے ہوئے انہوں نے کہا، ’طلعت حسین جیسا فنکار دوبارہ پیدا نہیں ہو سکتا۔‘ جبکہ عابد علی کے بارے میں انہوں نے کہا، ‘ میں نے ان کے ساتھ نجی پروڈکشنز میں کام کیا، وہ نہایت منکسر المزاج انسان تھے۔‘
انہوں نے مزید بتایا کہ گوادر میں چھ ماہ کے ایک پراجیکٹ کے دوران انہوں نے کبھی عابد علی کو کسی کے ساتھ غیرمناسب رویہ اختیار کرتے نہیں دیکھا۔ ’میں نے ان کے ساتھ پی ٹی وی کے زمانے سے کام کیا ہے۔ اگر میں کسی کی شکایت بھی کرتی تو وہ کہتے، ‘شائستہ، یہ سب ہوتا رہتا ہے، پریشان نہ ہو۔’‘
یہ بھی پڑھیے ’50 لوگوں کے سامنے مجھ پر چیخا گیا‘، عصمت زیدی نے شوبز انڈسٹری کا تلخ چہرہ بے نقاب کردیا
شائستہ جبین نے کہا کہ وہ ہمیشہ انڈسٹری کی سیاست سے دور رہ کر اپنے کام، خاندان اور ذاتی زندگی پر توجہ دیتی ہیں۔
گفتگو کے دوران انہوں نے ڈراموں کے یکساں اسکرپٹس اور اداکاروں کو معاوضوں کی ادائیگی میں تاخیر جیسے مسائل کی بھی نشاندہی کی۔ انہوں نے ہنستے ہوئے کہا، ’کبھی کبھی تو ہمیں اپنی تنخواہ کے لیے باقاعدہ منتیں کرنا پڑتی ہیں کہ خدارا ہماری ادائیگی کر دیں۔‘
انہوں نے بعض نوجوان اداکاروں کے رویے پر بھی تنقید کرتے ہوئے کہا کہ نئے فنکاروں کو سینئرز سے سیکھنے کا جذبہ اپنانا چاہیے۔ ’میں نے ہمیشہ اپنے بڑوں سے رہنمائی لی، آج بھی لیتی ہوں۔ اگر مجھے کسی چیز میں خامی نظر آتی ہے تو میں اپنے تجربے کی بنیاد پر سمجھاتی ہوں، اگرچہ بعض اوقات وہ بات انہیں بری لگ جاتی ہے۔‘
