روس نے یوکرین کے دارالحکومت کیف پر میزائلوں اور ڈرونز کی ایک بہت بڑی لہر کے ساتھ حملہ کیا ہے، جس کے نتیجے میں رہائشی عمارتوں، دفاتر اور اسکولوں کو شدید نقصان پہنچا ہے جبکہ کم از کم ایک شخص ہلاک اور 21افراد زخمی ہوگئے ہیں۔
یوکرینی فضائیہ کی جانب سے ٹیلیگرام چینل پر یہ انتباہ جاری کیے جانے کے بعد کہ روس ایک ہائپر سونک ‘اوریشنگ’ بیلسٹک میزائل داغ سکتا ہے، رات ایک بجے کے فوراً بعد پورا شہر دھماکوں کی آوازوں سے گونج اٹھا۔
یہ بھی پڑھیں: امریکی ثالثی میں روس یوکرین مذاکرات کا کوئی نتیجہ نہ نکل سکا، ابوظبی بیٹھک بغیر کسی پیشرفت کے ختم
کیف کے میئر ویٹالی کلیٹسکو کے مطابق دارالحکومت کے مرکزی ضلع شیوچینکو میں ایک 9 منزلہ رہائشی عمارت پر حملہ ہوا، جس کے بعد ہنگامی خدمات کے اہلکار وہاں لگی آگ بجھانے میں مصروف ہوگئے۔
میئر نے بتایا کہ زخمی ہونے والے 21 افراد میں سے 13 کو اسپتال منتقل کردیا گیا ہے، جن میں سے 3 کی حالت تشویشناک ہے جب کہ اتوار کو سورج نکلنے کے بعد شہر میں ایک بار پھر فضائی حملے کے سائرن بج اٹھے۔
رات بھر ہونے والے ان حملوں کے خوف سے بڑی تعداد میں شہریوں نے میٹرو اسٹیشنوں میں پناہ لی، جہاں وہ گھنٹوں محصور رہے اور دھماکوں کی آوازیں سنتے رہے۔
ضلع شیوچینکو میں واقع ایک اسکول پر حملے کے بعد ملبہ گرنے سے کئی لوگ ایئر ریڈ شیلٹر کے اندر ہی پھنس گئے، جبکہ اسی علاقے کے ایک کاروباری مرکز میں بھی متعدد افراد کے پھنسے ہونے کی اطلاعات ہیں۔
یہ بھی پڑھین: جی20 ممالک کے اجلاس میں روس یوکرین امن منصوبے پر غور، امریکا نے بائیکاٹ کیوں کیا؟
فوجی انتظامیہ کے سربراہ کا کہنا ہے کہ شہر میں 40 سے زیادہ مقامات کو نقصان پہنچا ہے، گورنر نیکولا کالاشنک کے مطابق کیف کے وسیع تر علاقے میں مزید 3 افراد زخمی ہوئے ہیں۔
ہفتے کے روز یوکرینی صدر ولادیمیر زیلنسکی نے یوکرین، امریکا اور یورپ کے انٹیلیجنس ڈیٹا کا حوالہ دیتے ہوئے پہلے ہی خبردار کردیا تھا کہ روس اوریشنگ میزائل سے حملہ کرنے کی تیاری کررہا ہے۔
یاد رہے کہ روس اس سے قبل بھی 2 بار یوکرین پر اس میزائل سے حملہ کرچکا ہے، جس کے بارے میں روسی صدر ولادیمیر پوتن کا دعویٰ ہے کہ یہ آواز کی رفتار سے 10 گنا زیادہ تیز ہونے کی وجہ سے ناقابلِ تسخیر ہے۔
