سابق ٹیسٹ کرکٹر سعید انور اور وسیم اکرم کی حج کے دوران سامنے آنے والی نئی تصاویر سوشل میڈیا پر تیزی سے وائرل ہو رہی ہیں اور مداحوں کی بھرپور توجہ حاصل کیے ہوئے ہیں۔
پاکستان کرکٹ ٹیم کے سابق اسٹار بیٹر سعید انور گزشتہ کئی برسوں سے تبلیغی سرگرمیوں اور دینی مصروفیات کے باعث شوبز اور میڈیا کی چکاچوند سے دور زندگی گزار رہے ہیں یہی وجہ ہے کہ ان کی نئی تصاویر کم ہی منظرِ عام پر آتی ہیں۔ تاہم اس مرتبہ حج کے روح پرور سفر کے دوران ان کی چند یادگار تصاویر سوشل میڈیا پر گردش کر رہی ہیں۔
وائرل تصاویر میں سعید انور ایک تبلیغی نشست میں شریک دکھائی دیتے ہیں جہاں ان کے ہمراہ وسیم اکرم، مصباح الحق اور فخر عالم بھی موجود ہیں۔ تصاویر میں تمام شخصیات سادہ اور روحانی ماحول میں نظر آئیں۔
True wisdom flows not from books alone, but from humbly asking questions of the learned. Tonight, Sheykh Hashim & Saeed Anwar illuminated our hearts with profound insights. This Hajj journey is a wealth I never knew I could possess eternal riches for the soul. Alhamdulillah! 🙏… pic.twitter.com/ojgoORU3rm
— Fakhr-e-Alam S.I & S.E (@falamb3) May 25, 2026
یہ تصاویر فخر عالم کی جانب سے سوشل میڈیا پر شیئر کی گئیں جنہیں مداحوں کی جانب سے بے حد پسند کیا جا رہا ہے جبکہ کئی صارفین نے سعید انور کو طویل عرصے بعد دیکھ کر خوشی کا اظہار بھی کیا۔
فخر عالم نے تصاویر شیئر کرتے ہوئے لکھا ہے کہ حقیقی علم صرف کتابوں کے صفحات میں محدود نہیں ہوتا بلکہ اہلِ علم کی صحبت میں عاجزی کے ساتھ سوال کرنے سے دلوں پر حکمت کے در کھلتے ہیں۔ آج رات شیخ ہاشم اور سعید انور کی ایمان افروز اور بصیرت سے بھرپور گفتگو نے دلوں کو ایک نئی روشنی عطا کی۔
یہ سفرِ حج میرے لیے محض ایک عبادت نہیں بلکہ ایسی روحانی دولت بن چکا ہے جس کی قدر الفاظ میں بیان نہیں کی جا سکتی۔ ایک ایسا خزانہ جو انسان کی روح کو ہمیشہ کے لیے مالا مال کر دے۔ الحمدللہ
وسیم اکرم، مصباح الحق اور فخر عالم ان دنوں ایک ساتھ فریضۂ حج کی ادائیگی کے لیے سعودی عرب میں موجود ہیں۔
