گوگل کا بڑا انکشاف، ہیکرز کا اے آئی کے ذریعے ’خفیہ ترین‘ سائبر حملے کا منصوبہ ناکام

ٹیکس دنیا کی معروف کمپنی گوگل نے خبردار کیا ہے کہ سائبر مجرموں (ہیکرز) نے پہلی بار آرٹیفیشل انٹیلیجنس (اے آئی) کا استعمال کرتے ہوئے دنیا کا خطرناک ترین اور خفیہ ترین سائبر حملہ تیار کیا ہے۔

یہ بھی پڑھیں:ہیکرز متحرک، بجلی بل سبسڈی اسکیم کے نام پر شہریوں کا ڈیٹا چوری کرنے کی کوشش

گوگل کی ‘تھریٹ انٹیلیجنس گروپ’ کی رپورٹ کے مطابق، ہیکرز نے جدید ترین AI ماڈلز کا غلط استعمال کر کے ایک ایسا ’زیرو ڈے شارٹ کٹ‘ (سیکیورٹی نقص) بنایا ہے جو سسٹم میں موجود ہونے کے باوجود دکھائی نہیں دیتا۔ یہ نقص اتنا خفیہ ہے کہ عام طور پر سافٹ ویئر انجینئرز بھی اس کا پتا نہیں لگا پاتے۔ گوگل کے ماہرین نے بروقت کارروائی کرتے ہوئے اس بڑے حملے کو ناکام بنا دیا ہے۔

رپورٹ میں بتایا گیا ہے کہ چین اور شمالی کوریا سے تعلق رکھنے والے ہیکرز اس قسم کے AI حملوں میں سب سے آگے ہیں۔

سائبر حملوں میں 10 گنا اضافہ

ایک اور رپورٹ کے مطابق، دنیا بھر میں اے آئی بوٹس کے ذریعے ہونے والے سائبر حملوں میں ریکارڈ 10 گنا اضافہ ہوا ہے۔ گزشتہ ایک سال کے دوران یہ حملے 20 لاکھ سے بڑھ کر 2 کروڑ 50 لاکھ تک پہنچ چکے ہیں۔

ماہرین کا کہنا ہے کہ جہاں ایک طرف بڑی ٹیکنالوجی کمپنیاں سیکیورٹی کو بہتر بنانے کے لیے نئے اے آئی ماڈلز بنا رہی ہیں، وہی ہیکرز چوری چھپے ان ماڈلز تک رسائی حاصل کر کے انہیں غلط مقاصد کے لیے استعمال کر رہے ہیں۔