ڈی آئی جی ہزارہ ناصر محمود ستی نے نتھیاگلی کا دورہ کرتے ہوئے ٹورسٹ سہولت سنٹر، سیکیورٹی انتظامات اور ٹریفک مینجمنٹ کا تفصیلی جائزہ لیا۔ اس موقع پر انہوں نے ملکی و غیر ملکی سیاحوں کو ہر ممکن سہولیات کی فراہمی کو خیبرپختونخوا پولیس کی اولین ترجیحات قرار دیتے ہوئے پولیس افسران کو عوام دوست رویہ اپنانے اور سیاحوں کو بہترین ماحول فراہم کرنے کی ہدایات جاری کیں۔
اس موقع پر ایس ایس پی ٹریفک وارڈن ایبٹ آباد محمد اشتیاق نے ڈی آئی جی ہزارہ کو ایبٹ آباد پولیس اور ٹریفک پولیس کی جانب سے ملکی و غیر ملکی سیاحوں کی رہنمائی، تحفظ اور سہولیات کی فراہمی کے لیے کیے گئے اقدامات پر تفصیلی بریفنگ دی۔
ڈی آئی جی ہزارہ ناصر محمود ستی نے پولیس کی جانب سے کیے گئے اقدامات کو سراہتے ہوئے کہا کہ ملکی و غیر ملکی سیاحوں کو ہر ممکن سہولیات کی فراہمی کو یقینی بنانا خیبرپختونخوا پولیس کی اولین ترجیحات میں شامل ہے۔
انہوں نے ٹورسٹ سہولت مرکز کا معائنہ کرتے ہوئے وہاں فراہم کی جانے والی معلوماتی، امدادی اور رہنمائی خدمات کا جائزہ لیا۔ ڈی آئی جی ہزارہ نے مرکز میں موجود سہولیات، عملے کی کارکردگی اور عوامی خدمت کے معیار کو مزید بہتر بنانے کی ہدایات بھی جاری کیں۔
دورے کے دوران ڈی آئی جی ہزارہ نے مختلف سیاحتی مقامات، شاہراہوں اور اہم مقامات پر سیکیورٹی اور ٹریفک انتظامات کا معائنہ کیا۔ انہوں نے سیاحوں سے ملاقات بھی کی اور پولیس کی جانب سے فراہم کردہ سہولیات کے بارے میں آگاہی حاصل کی۔
سیاحوں نے پولیس کے اقدامات کو سراہتے ہوئے ڈی آئی جی ہزارہ اور ایبٹ آباد پولیس کا شکریہ ادا کیا۔
ناصر محمود ستی نے پولیس افسران اور اہلکاروں کو ہدایات جاری کرتے ہوئے کہا کہ ٹریفک کی روانی کو ہر صورت برقرار رکھا جائے اور کسی بھی ہنگامی صورتحال سے نمٹنے کے لیے فوری رسپانس کو یقینی بنایا جائے۔
انہوں نے کہا کہ ملکی و غیر ملکی سیاحوں کو محفوظ اور خوشگوار ماحول فراہم کرنا محکمہ پولیس کی ذمہ داری ہے۔ سیاحوں کی رہنمائی، شکایات کے فوری ازالے اور سفری سہولیات کی فراہمی کے لیے تمام دستیاب وسائل بروئے کار لائے جائیں۔
ڈی آئی جی ہزارہ نے مزید ہدایت کی کہ سیاحوں کے ساتھ خوش اخلاقی سے پیش آیا جائے اور انہیں ہر ممکن معاونت فراہم کی جائے تاکہ ایبٹ آباد آنے والے سیاح خوشگوار یادیں لے کر واپس جائیں اور خیبرپختونخوا پولیس اور علاقے کا مثبت تشخص مزید اجاگر ہو۔
