وزیراعلیٰ خیبرپختونخوا محمد سہیل آفریدی نے حج 2026 کے شاندار اور مثالی انتظامات پر سعودی عرب کے سفیر نواف بن سعید المالکی کو تعریفی خط ارسال کرتے ہوئے سعودی حکومت کی خدمات کو بھرپور انداز میں سراہا ہے۔ وزیراعلیٰ نے حج کے دوران فراہم کیے گئے منظم، محفوظ اور روحانی ماحول کو قابلِ تحسین قرار دیتے ہوئے کہا کہ سعودی عرب نے حجاج کرام کے لیے غیرمعمولی سہولیات اور بہترین انتظامات یقینی بنائے۔
یہ بھی پڑھیں:حج 2026: وطن واپسی کا سلسلہ شروع، پہلی پرواز اسلام آباد لینڈ کر گئی
وزیراعلیٰ خیبرپختونخوا محمد سہیل آفریدی نے اپنے خط میں کہا کہ حج 2026 کے دوران سعودی حکومت کی جانب سے کیے گئے انتظامات نہایت مثالی اور قابلِ تعریف ہیں۔ انہوں نے کہا کہ خیبرپختونخوا کے حجاج نے بھی سعودی حکام کی خدمات اور مہمان نوازی کو دل سے سراہا ہے۔
وزیراعلیٰ نے سعودی عرب کے سفیر نواف بن سعید المالکی سے ملاقات کی خواہش کا اظہار کرتے ہوئے کہا کہ وہ باہمی دلچسپی کے امور اور مستقبل میں تعاون کے مزید فروغ پر تبادلہ خیال کرنا چاہتے ہیں۔
یہ بھی پڑھیں:سعودی وزارتِ داخلہ کا حج 1447 ہجری کی کامیاب تکمیل کا اعلان، اگلے حج سیزن کی تیاریوں کا آغاز
انہوں نے اپنے خط میں اس بات پر بھی زور دیا کہ سعودی حکومت نے حجاج کرام کے لیے بہترین انتظامات، سہولیات اور روحانی سکون کا ماحول فراہم کیا، جو لائقِ تحسین ہے۔ وزیراعلیٰ نے کہا کہ خیبرپختونخوا حکومت اور عوام سعودی عرب کے اس مثالی کردار پر تہہ دل سے شکر گزار ہیں۔
وزیراعلیٰ کے مطابق حج جیسے عظیم مذہبی فریضے کے دوران نظم و ضبط، سیکیورٹی اور سہولیات کی اعلیٰ سطح نے لاکھوں حجاج کے لیے سفر کو آسان اور یادگار بنایا۔
