حجاج کرام کی وطن واپسی کا باقاعدہ آغاز ہو گیا ہے اور پہلی حج پرواز پی کے 742 کے ذریعے 114 عازمینِ حج جدہ سے اسلام آباد پہنچ گئے ہیں۔
میڈیا رپورٹ کے مطابق اسلام آباد انٹرنیشنل ایئرپورٹ پر چیف آپریٹنگ آفیسر آفتاب گیلانی نے واپس آنے والے حجاج کا استقبال کیا۔ اس موقع پر ایئرپورٹ سیکیورٹی فورس اور پاکستان انٹرنیشنل ایئرلائنز کے اعلیٰ حکام بھی موجود تھے۔
یہ بھی پڑھیں:حج 1447 ہجری: سعودی وزارتِ صحت کی کامیاب طبی خدمات، 25 لاکھ سے زائد افراد مستفید
دوسری جانب حج آپریشن کے تحت اگلی پرواز پی کے 732 جدہ سے لاہور روانہ ہو گی، جبکہ کراچی کی پہلی حج پرواز پی کے 860 بھی آج جدہ سے روانہ ہو کر شام 7 بج کر 25 منٹ پر کراچی پہنچے گی۔
ترجمان کے مطابق پی آئی اے کا بعد از حج آپریشن 30 مئی سے 30 جون تک جاری رہے گا، جس کے دوران جدہ اور مدینہ منورہ سے اسلام آباد، لاہور، کراچی، فیصل آباد، ملتان، سیالکوٹ اور کوئٹہ کے لیے پروازیں چلائی جائیں گی۔
ترجمان نے مزید بتایا کہ مجموعی طور پر 213 پروازوں کے ذریعے 53 ہزار سے زائد حجاج کرام کو وطن واپس لایا جائے گا۔ پی آئی اے کے مطابق حج آپریشن کے تمام انتظامات مکمل کر لیے گئے ہیں اور اس کی براہِ راست نگرانی سی ای او خود کر رہے ہیں۔
