عیدالاضحیٰ کے تیسرے روز لاہور میں بظاہر گوشت کے بیجا استعمال اور غیر محتاط غذائی عادات کے باعث شہریوں کی بڑی تعداد ڈائریا، گیسٹرو اور معدے کی دیگر بیماریوں میں مبتلا ہو گئی۔
یہ بھی پڑھیں: گوشت محفوظ کرنے کے طریقے کیا ہیں؟
گزشتہ دو روز کے دوران شہر کے 6 بڑے سرکاری اسپتالوں میں 20 ہزار سے زائد مریضوں نے علاج کے لیے رجوع کیا۔
اسپتال ذرائع کے مطابق میو اسپتال میں گزشتہ روز سے اب تک 35 سو سے زائد مریض رپورٹ ہوئے جبکہ جناح اسپتال میں 2 ہزار سے زائد اور سروسز اسپتال میں 18 سو سے زائد مریضوں کو طبی امداد فراہم کی گئی۔ اس کے علاوہ جنرل ہسپتال اور گنگارام اسپتال میں بھی 15 سو سے زائد مریض رپورٹ ہوئے۔
طبی ماہرین کا کہنا ہے کہ عید کے دنوں میں گوشت کا حد سے زیادہ استعمال، مصالحے دار اور چکنائی سے بھرپور غذاؤں کا بے دریغ استعمال شہریوں کو معدے کی مختلف بیماریوں میں مبتلا کر رہا ہے۔
ماہرین نے شہریوں کو ہدایت کی ہے کہ گوشت کو اعتدال کے ساتھ استعمال کریں اور اسے سبزیوں کے ساتھ پکانے کو ترجیح دیں۔
طبی ماہرین کے مطابق گوشت کے ساتھ سلاد، سبزیاں، دہی اور لیموں کا استعمال نظامِ ہاضمہ بہتر رکھنے میں مددگار ثابت ہوتا ہے جبکہ ایک وقت میں 2 سے 3 چھوٹے ٹکڑوں سے زیادہ گوشت کھانے سے گریز کیا جائے۔
مزید پڑھیے: عید پر گوشت کا استعمال اور صحت کا خیال کیسے رکھا جائے؟
ماہرین نے خبردار کیا ہے کہ باربی کیو اور زیادہ چکنائی والے گوشت کا استعمال کولیسٹرول بڑھا سکتا ہے اور دل سمیت دیگر امراض کا خطرہ پیدا کر سکتا ہے۔
انہوں نے کہا کہ شوگر کے مریض گوشت کم مقدار میں اور بغیر چکنائی کے استعمال کریں، جبکہ گوشت کے ساتھ میٹھے مشروبات اور کولڈ ڈرنکس سے مکمل پرہیز کریں۔
اسی طرح ہائی بلڈ پریشر کے مریض نمکین اور مصالحہ دار گوشت کم کھائیں اور کلیجی یا انتہائی چکنائی والے حصوں سے اجتناب کریں۔
ماہرین نے یورک ایسڈ کے مریضوں کو سرخ گوشت محدود مقدار میں استعمال کرنے کا مشورہ دیا ہے۔
طبی ماہرین کے مطابق دل کے مریض بغیر چربی والے بکرے کے گوشت کو ترجیح دیں اور ایک وقت میں 50 سے 75 گرام سے زیادہ گوشت نہ کھائیں جبکہ گھی اور تیل میں تیار کردہ گوشت سے حتی الامکان پرہیز کریں۔
مزید پڑھیں: سعودی عرب: حج کے بعد کی گئی قربانی کا گوشت کہاں جاتا ہے؟
ماہرین نے شہریوں پر زور دیا ہے کہ عید کی خوشیوں کے دوران متوازن غذا اپنائیں تاکہ معدے اور دل کے امراض سے محفوظ رہا جا سکے۔
