صدر مملکت آصف زرداری نے اٹلی کے یومِ جمہوریہ کے موقع پر اطالوی صدر سرجیو میتاریلا اور عوام کو مبارکباد پیش کرتے ہوئے دونوں ممالک کے درمیان دیرینہ دوستانہ تعلقات کو مزید مستحکم بنانے کی خواہش کا اظہار کیا ہے۔
اپنے تہنیتی پیغام میں صدر مملکت نے کہا کہ پاکستان اٹلی کے ساتھ اپنے دوستانہ اور تاریخی تعلقات کو انتہائی قدر کی نگاہ سے دیکھتا ہے۔
یہ بھی پڑھیں: امریکا ایران جنگ بندی: نوبیل انعام کا اصل حق دار پاکستان ہے، اٹلی
انہوں نے کہا کہ دونوں ممالک کے روابط باہمی اعتماد، تعاون اور امن و خوشحالی کے مشترکہ عزم پر مبنی ہیں اور انہیں یقین ہے کہ آنے والے برسوں میں یہ دوطرفہ تعلقات مزید فروغ پائیں گے۔
صدر آصف زرداری نے کہا کہ پاکستان یورپی یونین کے ساتھ اپنے تعلقات کو خصوصی اہمیت دیتا ہے اور بین الاقوامی تعاون، مذاکرات اور عالمی امن و استحکام کے فروغ میں یورپی یونین کے اندر اٹلی کے تعمیری کردار کو سراہتا ہے۔
مزید پڑھیں: پاکستان کے ماہر افرادی قوت کے لیے اٹلی 10,500 ورک ویزے جاری کرے گا
صدر مملکت نے باہمی دلچسپی کے مختلف شعبوں میں پاکستان اور یورپی یونین کے درمیان تعاون کو مزید وسعت دینے کے عزم کا اعادہ کرتے ہوئے کہا کہ پاکستان خطے اور دنیا میں امن، استحکام اور ترقی کے لیے بین الاقوامی شراکت داری کو فروغ دینے کے لیے پرعزم ہے۔
